اسلام آباد (این این آئی) وزیراعظم عمران خان کو پاکستان سٹیزن پورٹل پرصوبوں کی کارکردگی رپورٹ پیش کردی گئی، جس کے مطابق وفاقی وزارتوں اوراداروں نے تین لاکھ چونسٹھ ہزار سے زائد شکایات حل کیں، وفاقی اداروں کی جانب سے نواسی فیصد شکایات حل کی گئیں۔شہریوں کی شکایات حل کے حوالے سے سندھ حکومت سب سے پیچھے ہے، سندھ کی صوبائی محکمے اب تک صرف تیس فیصد شکایات حل کرسکے۔رپورٹ میں کہا گیا پاکستان بھر میں زیرالتوا شکایات کی تعداد سینتیس ہزار پانچ سوچوہترہے،

جس میں سے بتیس ہزار زیرالتوا شکایات صرف حکومت سندھ کی ہیں۔وزیراعظم عمران خان نے کہا حکومت سندھ کی جانب سے عدم تعاون کا نقصان شہریوں کو ہو رہا ہے۔وزیراعظم نے سندھ کے چیف سیکرٹری کوخط لکھنے کی ہدایت کردی اور کہا وفاقی و صوبائی اداروں کے درمیان مربوط حکمت عملی بنائی جائے۔رپورٹ کے مطابق وفاقی دارالحکومت میں 90 فیصد شکایات پر عملدرآمد ہوا، کے پی حکومت نے86 اورپنجاب نے 85 فیصد شکایات حل کیں جبکہ بلوچستان اور گلگت بلتستان حکومت نے 74 فیصد شکایات حل کیں۔