فیصل آباد(آن لائن)تھانہ صدر پولیس نے مسلم لیگ (ن) کے سٹی صدر شیخ اعجاز احمد کو گھر پر چھاپہ مار کر گرفتار کرکے پانچ گھنٹے حراست میں رکھنے کے بعد چھوڑ دیا۔(ن) لیگی کارکنوں کا گرفتاریوں کیخلاف احتجاجی مظاہرہ ، ضلع کونسل چوک بلاک ۔
پولیس کی بھاری نفری تعینات ۔ آن لائن کے مطابق تھانہ صدر پولیس نے مسلم لیگ (ن) کے ضلعی صدر شیخ اعجاز احمد کو ستیانہ روڈ پر واقع رحمان گارڈن میں ان کے گھر پر چھاپہ مار کر حراست میں لے لیا ۔ پولیس نے شیخ اعجاز کو حوالات میں بند کرنے کی بجائے نامعلوم مقام پر منتقل کیا اور شام کو موٹروے انٹرچینج کے قریب جاکر چھوڑ دیا ۔(ن) لیگ نے رانا ثنا اللہ کی گرفتاری کے خلاف گزشتہ روز احتجاج کا اعلان کیا تھا ۔ (ن) لیگ کی طرف سے متوقع احتجاجی مظاہروں میں پرتشدد ردعمل کے خدشے کے باعث پولیس کی بھاری نفری کینال روڈ سمیت مختلف شاہراہوں پر تعینات کی گئی تھی تاہم کوئی ناخوشگوار واقعہ پیش نہیں آیا ۔دوسری جانب شیخ اعجاز کی گرفتاری پر ڈسٹرکٹ بار کی جانب سے احتجاج اور عدالتی بائیکاٹ کی کال دی گئی تھی جو ان کی رہائی پر واپس لے لی گئی۔ معتبر ذرائے سے معلوم ہوا ہے کہ ممکنہ احتجاج کو روکنے کیلئے مسلم لیگ (ن) کے ارکان اسمبلی‘ ٹکٹ ہولڈرز‘ سرگرم کارکنوں‘ سابق بلدیاتی نمائندوں‘ میئرز‘ ڈپٹی میئرز‘ چیئرمینوں اور کونسلرز کی فہرستوں کی تیاری شروع کر دی گئی جس کے تحت بڑے پیمانے پر کریک ڈائون کا امکان ہے۔
