کراچی(این این آئی)وفاقی وزیرجہازبرائے پورٹ اینڈ شپنگ علی زیدی نے کہاہے کہ ملک میں ہونے والی کرپشن نے سب کچھ تباہ کردیا ہے،پی پی پی والے بھی عدالتوں کے چکر کاٹ رہے ہیں، آصف زرداری ملزم سے مجرم ہو جائیں تو بلاول ہائوس سمیت ان کی جائیدادیں بھی ضبط ہونی چاہئیں۔
ملک سے کرپشن کا پیسہ لے جانے اور لانے کے لئے ایک ہی کمپنی استعمال ہوئی جس نے زرداری اینڈ کمپنی اور شریف برادران کے پورے ٹبر کے پیسے منتقل کیے،حکومت اگرگیس اوربجلی سستی کرے گی تو مزید قرضہ لینا پڑے گا۔خصوصی گفتگوکرتے ہوئے انہوں نے کہاکہ سمندر میں تیل کی تلاش پر کام جاری ہے جمعہ کو میں خود سمندر میں تیل کی تلاش کے جہاز پر گیا تھا ، سمندر میں تیل کی تلاش کے لیے 5500ہزار میٹر کے ڈرلنگ کرنا ہے ،کل تک 5392 میٹر ڈرلنگ کی جاچکی ہے بس اب مزید دو ہفتے میں تیل یا گیس کی مکمل تفصیلات مل جائیں گی ،قوم دعا کرے بڑی خوشخبری ملے ۔سمندر میں تیل کی تلاش میں جلد اچھی خبر سامنے آئے گی۔ انہوں نے کہاکہ میں یہ کہوں گا کہ عمران خان نے پوری دنیا میں خام تیل کی قیمت بڑھا دی جب عمران خان آئے تو 51ڈالر فی بیرل تھا اب 70 ڈالر تک پہنچ گیا۔ وفاقی وزیرنے کہاکہ ٹی ٹی شریف نے کہاں کہاں سے پیسے بھیجے سب سامنے آرہا ہے اس سال پاکستان کو 9ارب ڈالر پرانے قرضے ادا کرنے ہیں اگلے سال دو برس میں 27 ارب ڈالر ادا کرنے ہیں ،ہم آئی ایم ایف کے ہاس شوق سے نہیں گئے ،پرانے قرضوں کو ادا کرنے کے لیے آئی ایم ایف کے پاس جانا پڑا۔ انہوں نے کہاکہ اگر ہم بجلی سستی کردیں تو مزید قرضہ لینا پڑے گا ۔گیس سستا کریں تو قرضہ لینا پڑے گا ،ہم 2021 تک سرکلر ڈیٹ کا مسئلہ حل کردیں گے ، سرکلر ڈیٹ کے خاتمے کے لیے چوری کا خاتمہ کریں گے ،مشکلات ہیں اس کا سامنا کرکے ہی آگے کامیابی ملے گی۔
