اسلام آباد (این این آئی)افغان صدر اشرف غنی نے وزیر اعظم عمران خان سے ٹیلیفونگ گفتگو میں دورہ پاکستان کی دعوت قبول کرلی۔ ذرائع نے ”این این آئی“کو بتایا کہ صدر اشرف غنی نے وزیر اعظم کی جانب دورہ پاکستان کی دعوت قبول کرلی،تاریخوں کا اعلان بعد میں کیا جائے گا۔ کابل میں سرکاری ٹی وی نے بھی فون گفتگو کی تصدیق کی۔ افغان ٹی وی کے مطابق صدر غنی نے پاکستان
کے دورے کی دعوت قبول کرلی۔ یاد رہے کہ صدر اشرف غنی نے اس ہفتے کابل میں لویہ جرگہ سے خطاب کرتے ہوئے پاکستان کے ساتھ تعلقات بہتر بنانے کا وعدہ کیا تھا۔افغان صدر نے کہا تھا کہ افغانستان میں امن سے دونوں ممالک کے درمیان اقتصادی تعلقات کے راستے کھل جائینگے۔ عمران نے چند دن پہلے افغانستان میں امن عمل کی حمایت اور تشدد میں اضافے کی مذمت کی تھی۔
