لاہور (این این آئی)وزیر اعلیٰ پنجاب سردار عثمان بزدار کی وزیر ریلوے شیخ رشید اور صوبائی وزراء کے ہمراہ لاہور سے بذریعہ ٹرین راولپنڈی روانگی کے موقع پر سکیورٹی کے انتہائی سخت انتظامات کئے گئے ، حکومتی شخصیات نے ٹرین کے ساتھ لگائے گئے خصوصی سیلون میں سفر کیا ۔ تفصیلات کے مطابق وزیر ریلوے شیخ رشید احمد کی دعوت پر وزیر اعلیٰ پنجاب سردار عثمان بزدار صوبائی وزراء کے ہمراہ بذریعہ ٹرین لاہور سے راولپنڈی
کیلئے روانہ ہوئے ۔ وزیر اعلیٰ کی آمد اور روانگی کی وجہ سے ریلوے اسٹیشن پر سکیورٹی کے غیر معمولی انتظامات کئے گئے تھے جس کی وجہ سے مسافروں کو شدید مشکلات کا سامنا کرنا پڑا۔سکیورٹی کے سلسلہ ریلوے پولیس کے کمانڈوز تعینات رہے جبکہ سراغ رساں کتوں کی مدد سے ٹرین کی متعدد بار چیکنگ کی گئی ۔ وزیر اعلیٰ سردار عثمان بزدار ، وزیر ریلوے شیخ رشید احمد اور صوبائی وزراء نے ٹرین کے ساتھ لگائے گئے خصوصی سیلون میں سفر کیا ۔
