اسلام آباد( آن لائن ) چوہدری برادران نے نواز شریف کی عیادت کیلئے ملاقات کی خواہش ظاہر کر دی تاہم ، نواز شریف ملاقات کرنے یا نہ کرنے کا فیصلہ نہ کر سکے ،پارٹی کی سینئر قیادت سے مشاورت کے بعد حتمی فیصلہ کرینگے۔تفصیلات کے مطابق ملک کی بدلتی ہوئی سیاسی صورتحال کے پیش نظر مسلم لیگ (ق) اور (ن) لیگ میں قربتیں بڑھنے لگی ۔ایک ہفتہ قبل مسلم لیگ (ق) کے سینئر رہنما چوہدری مونس الٰہی اور پنجاب اسمبلی میں
اپوزیشن لیڈر حمزہ شہباز کے درمیان ون آن ون ملاقات ڈیڑھ گھنٹہ تک جاری رہی ۔ ذرائع کے مطابق اس ملاقات کو دونوں اطراف سے سینئر قیادت کی آشیرباد حاصل تھی ۔مسلم لیگ (ق) کے سربراہ چوہدری شجاعت نے سابق وزیراعظم میاں نواز شریف کی عیادت کرنے کے لئے ان کے گھر جاتی امراء پیغام بھجو ا دیا ہے ۔ ذرائع نے بتایا کہ نواز شریف نے ملاقات کرنے یا نہ کرنے کا فیصلہ پارٹی کی سینئر رہنمائوں سے مشاورت سے مشرو ط کر دیا ہے۔
