اسلام آباد (این این آئی) وزیراعظم آفس کے ایک فلور پر ایک حصے میں لگنے والی آگ پرقابو لیا گیا ، تمام ملازمین محفوظ رہے ۔ ذرائع کے مطابق پیر کو وزیر اعظم آفس کے ایک فلور پر ایک محدود حصے میں شارٹ سرکٹ کے باعث آگ لگنے کا واقعہ پیش آیا
تاہم وزیر اعظم آفس میں موجود آگ بجھانے کے آلات اور فائر بریگیڈ کی بروقت کاروائی سے آگ پر قابو پا لیا گیا ہے۔ ذرائع کے مطابق وزیر اعظم آفس کے تمام ملازمین محفوظ رہے۔ترجمان وزیراعظم آفس کے مطابق وزیراعظم سیکرٹریٹ کے تیسرے فلور کے باتھ روم میں آگ لگی جس پر وزیراعظم آفس میں موجود آگ بجھانے کے آلات اور فائر بریگیڈ کی بروقت کاروائی سے قابو پا لیا گیا۔ترجمان نے بتایا کہ آگ شارٹ سرکٹ کے باعث لگی اور سیکرٹریٹ کی تیسری منزل پر آگ لگنے کے باعث باتھ روم سے دھواں ڈک کے ذریعے چھٹی منزل تک پہنچ گیا، دھوئیں کے باعث وزیراعظم سیکریٹریٹ کے چھٹے فلور پر بو پھیل گئی۔ترجمان کے مطابق آتشزدگی کے واقعے میں وزیراعظم آفس کے تمام ملازمین محفوظ رہے۔دوسری جانب نجی ٹی وی کے مطابق جس وقت آگ لگی اس وقت وزیراعظم عمران خان میٹنگ روم میں میٹنگ کررہے تھے، آگ کی اطلاع پر بھی وزیراعظم نے میٹنگ جاری رکھی جس پر دوبارہ وزیراعظم کو اطلاع دی گئی کہ دھواں پھیل رہا ہے عمارت سے نکلنا ہوگا۔دوبارہ اطلاع پر وزیراعظم نے کہا کہ پہلے اسٹاف کوعمارت سے نکالیں پھر میں نکلوں گا۔
