اسلام آباد(مانیٹرنگ ڈیسک)جعلی اکاؤنٹس کیس میں دو ملزم خواتین نے گواہ بننے کی درخواست کردی۔نجی ٹی وی کے مطابق سابق صدر آصف زرداری اور ان کی ہمشیرہ فریال تالپور جعلی اکاؤنٹس کیس میں پہلی مرتبہ آج احتساب عدالت کے روبرو پیش ہوئے۔

جج ارشد ملک نے کیس کی سماعت کی تو اس موقع پر کرن اور نورین نامی 2 ملزم خواتین نے گواہ بننے کی درخواست دائر کی۔ خواتین ملزمان نے کہا کہ ہمارا نام ملزمان میں ہے لیکن ہم گواہی دینے کو تیار ہیں اور ہم نے چیئرمین نیب کو بھی درخواست لکھی ہے۔جج ارشد ملک نے خواتین ملزمان سے سوال کیا،کیا آپ وعدہ معاف گواہ بنیں گی؟ جس پر دیگر ملزمان کے وکلا نے اس کی مخالفت کرتے ہوئے کہا کہ وعدہ معاف گواہ بننے کی یہ کوئی اسٹیج نہیں ہے۔فاضل جج نے نیب پراسیکیوٹر سردار مظفر عباسی سے استفسار کیا خواتین کی درخواست پر آپ کیا کہتے ہیں؟جس پر انہوں نے کہا کہ ہمیں چیک کرنا ہوگا کہ کوئی درخواست نیب میں ہے یا نہیں۔عدالت نے دونوں خواتین کو الگ الگ تحریری درخواستیں جمع کرانے کی ہدایت کرتے ہوئے سماعت کو 16 اپریل تک کے لیے ملتوی کردیا۔