راولپنڈی(این این آئی)پاک فوج نے ایل او سی پر بلا اشتعال فائرنگ کر نے والی بھارت فوج کومنہ توڑ جواب دیا ہے جس کے نتیجے میں پانچ بھارتی فوجی ہلاک اور متعدد چوکیاں تباہ ہوگئیں ۔ جمعہ کو پاک فوج کے شعبہ تعلقات عامہ (آئی ایس پی آر) کے مطابق بھارتی فوج نے ایک بار پھرچری کوٹ سیکٹر میں بلا اشتعال فائرنگ کی اور شہری آبادی کو نشانہ بنایا جس سے خاتون اور 4 بچوں سمیت 6 شہری زخمی ہو گئے۔آئی ایس پی آر کے مطابق زخمیوں میں شبنم، کاشان، نشا، آصفہ، شاہد حسین اور فیضان شامل ہیں۔ فائرنگ سے زخمی ہونے والے شہریوں کو ہسپتال منتقل کر دیا گیا ہے
جہاں انھیں طبی امداد دی جا رہی ہے۔آئی ایس پی آر کے مطابق پاک فوج نے شہری آبادی کو نشانہ بنانے والی بھارتی چوکیوں پر جوابی وار اور بھرپور کارروائی کی جس کے نتیجے میں 5 بھارتی فوجیوں کے ہلاک اور کئی کے زخمی ہونے کی اطلاعات ہیں ۔ اطلاعات کے مطابق پاک فوج کی منہ توڑ جوابی کارروائی کے نتیجے میں کئی بھارتی چوکیاں بھی تبا ہ ہوگئیں ۔یاد رہے کہ تین روز قبل بھی بھارتی فوج نے سیز فائر معاہدے کی خلاف ورزی کرتے ہوئے رکشکری سیکٹر میں اشتعال انگیزی کی تھی جس کے نیتجے میں پاک فوج کے تین جوان شہید ہوئے تھے۔