اسلام آباد(آن لائن) پاکستان کے محکمہ داخلہ نے پاکستان آنے والے بین الاقوامی سیاحوں پر این او سی کی پابندی ختم کردی ہے۔ منگل کے روز وزارت داخلہ کی جانب سے جاری ہونے والے نوٹیفکیشن میں کہا گیا ہے کہ سیاح پورے ملک میں آزادانہ نقل و حرکت کرسکتے ہیں مگر ایسے علاقوں میں داخل نہیں ہوسکیں گے جہاں داخلہ ممنوع کا بورڈ آویزاں ہوگا۔

نوٹس میں سیاحوں کو آزاد کشمیر تک نقل و حرکت کی اجازت دی گئی ہے لیکن ایل او سی سے پانچ میل دور رہنے کی پابندی ہوگی۔غیرملکی سیاح آزاد جموں و کشمیراور گلگت بلتستان میں بھی آزادانہ نقل و حرکت کر سکیں گے۔محکمہ داخلہ نے ہدایت کی ہے کہ سیاح پاک چین اور پاک افغان بارڈر سے 10 میل دو ر رہنے کے پابند ہوں گے، آزاد جموں و کشمیر اور مقبوضہ کشمیر بارڈر سے 5 میل جب کہ سیاچن بارڈر سے بھی 10 میل دور رہیں گے۔یاد رہے کہ قبل ازیں آزادکشمیر میں بین الاقوامی سیاحوں کو این او سی لے کر آنا پڑتا تھا۔دوسری جانب وفاقی وزیر اطلاعات و نشریات فواد چودھری نے سماجی رابطے کی ویب سائٹ ٹوئٹ کیا ہے کہ حکومت نے ایک اور بہت بڑا سنگ میل عبور کر لیا ہے ۔وزیر اعظم کے ویژن کے مطابق پاکستان کو سیاحوں کی جنت بنانے کے لئے غیر ملکی افراد کی این او سی کی شرط ختم کر دی گئی ہے ۔ اس مشن کی تکمیل کے لئے این او سی کا ختم ہونا بہت بڑا اقدام ہے ۔ جس سے پاکستان میں مزید خوشحالی آئے گی ۔