کوئی خطیب لپ سٹک کے خلاف تقریر کر رہا تھا‘ (اس) کا کہنا تھا یہ یہودیوں کی سازش ہے‘ اس میں حرام جانوروں کی چربی استعمال ہوتی ہے اور مسلمان عورتوں کو یہ فی الفور ترک کر دینی چاہیے‘ ہال میں موجود کسی شرارتی آدمی نے اُٹھ کر کہا‘ جناب لپ سٹک تو آپ کی اپنی بیگم بھی استعمال کرتی ہیں‘ خطیب صاحب پریشان ہو گئے اور دائیں بائیں دیکھ کر بولے‘ آپ اس کی بات چھوڑیں اسے توجچتی بھی بہت ہے‘

کل جب پاکستان پیپلزپارٹی کے ورکروں نے نیب ہیڈ کوارٹر کے سامنے قانون کو ہاتھ میں لینے کی کوشش کی‘ پولیس سے ہاتھا پائی کی‘ گیٹ کا گھیراؤ کیا ‘ راستے کی تاریں ہٹائیں اور حکومت نے اس پر ردعمل دیا تو ن لیگ اور پیپلزپارٹی کے کارکنوں نے سوشل میڈیا پر پاکستان تحریک انصاف کے مختلف لیڈروں کی پرانی فوٹیجز اور بیانات پوسٹ کرنا شروع کر دیئے۔ ان میں وزیراعظم عمران خان کے پرانے خیالات‘ صدر عارف علوی کا جیل کی گاڑی کی ہوا نکالنے کا عمل اور شیریں مزاری کی پولیس کی رکاوٹیں ہٹانے کی فوٹیجز شامل ہیں‘ کارکنوں کا کہنا ہے ماضی میں آپ بھی یہی حرکتیں کرتے رہے ہیں‘ میں جب بھی یہ کلپس دیکھتا ہوں تو مجھے لپ سٹک والے خطیب یاد آ جاتے ہیں اور میں یہ کہنے پر مجبور ہو جاتا ہوں، ن لیگ اور پیپلزپارٹی کے کارکنوں کو یہ یاد رکھنا چاہیے یہ ساری حرکتیں لپ سٹک کی طرح پاکستان تحریک انصاف کو جچتی ہیں‘ آپ ریاست سے ٹکرانے والے کون ہوتے ہیں‘ یہ صرف یہ کر سکتے ہیں‘ آپ نہیں کر سکتے اور آپ اپنے اور ان کے درمیان فرق کو ہمیشہ یاد رکھیں۔ ہم آج کے موضوع کی طرف آتے ہیں، یہ بہت اچھی بات ہے‘ ریاست کی رٹ اسٹیبلش ہونی چاہیے لیکن کرے گا کون اور اس کی کیا گارنٹی ہے آج کی حکومت جب اپوزیشن اور اپوزیشن جب حکومت میں آئے گی تو یہ سب کچھ نہیں ہوگا‘ یہ ہمارا آج کا ایشو ہوگا اور چیف جسٹس نے بریگیڈیئر اسد منیر کی خودکشی پر سوموٹو نوٹس لے لیا‘ چیئرمین نیب کو طلب کر لیا گیا‘ ہم اس پر بھی بات کریں گے‘ ہمارے ساتھ رہیے گا۔