اسلام آباد(سی پی پی )سابق امریکی سفیر کیمرون منٹر نے وزیراعظم پاکستان عمران خان اور امریکا کے صدر ڈونلڈ ٹرمپ کو بہترین لیڈر قرار دیدیا۔خبر رساں ادارے کے مطابق سابق امریکی سفیر کیمرون منٹر نے ایک بیان میں کہا کہ پاکستان اور مریکا کے درمیان برف پگھل رہی ہے۔انہوں نے واشنگٹن اور پاکستان میں بہتر تعلقات کی خواہش کا بھی اظہار کیا۔

ان کا کہنا تھا کہ دنیا میں 2 ہی بڑے لیڈر ہیں ایک عمران خان اور دوسرے ڈونلڈ ٹرمپ۔ سابق امریکی سفیر کیمرون منٹر نے انکشاف کیا کہ امریکی انتظامیہ اس وقت پاکستان میں دلچسپی نہیں لے رہی۔ انکا کہنا تھا کہ بدقسمتی ہے امریکی انتظامیہ میں بہت کم لوگ پاکستان کے بارے میں سوچ رہے ہیں۔بات عمران خان کی نہیں بلکہ پریشان کن بات یہ ہے کہ بہت کم لوگ پاکستان میں دلچسپی لے رہے ہیں۔انہوں نے کہا کہ امریکا بھارت‘روس اور چائنہ کیساتھ بھی بات چیت میں مصروف ہے۔امریکا بات چیت کے ذریعے باہمی معاملات حل کرنے کا خواہش مند ہے۔ امریکا کا صرف اور صرف ایک مفاد ہے کہ ہر ملک ترقی کرے۔ انہوں نے بتایا کہ جب میں پاکستان میں سفیرتھا تودہشتگردی سب سے بڑا مسئلہ تھا‘2000 میں دہشت گردی پر قابو پانے کیلئے کام کیا۔تعلیم کے فروغ کیلئے اور 2012میں صحت کی بہتری کیلئے کام کیا۔سیاسی معاملات بہتر نہ ہونے کی وجہ سے پاکستان کے معاملات بہتر نہیں۔انکا کہنا تھا کہ ہم نے پاکستان کی بہتری کے لیے بہت زیادہ رقم دی مگر رقم کا استعمال ٹھیک طریقے سے نہیں کیا گیا۔پاکستان کو امریکی فنڈز اچھے طریقے سے استعمال کرنے چاہیے ہیں۔انہوں نے کہا کہ بھارت اور پاکستان کیساتھ ہمیں معاملات اچھے رکھنے پڑتے ہیں۔پاکستانی شہر کراچی اور انڈین شہر ممبئی ہمارے لیے معاشی حب ہیں۔