پوری دنیا میں گھوڑوں کی ریس میں گھوڑوں کی رفتار دیکھی جاتی ہے لیکن جاپان میں ایک ایسی ریس بھی ہوتی ہے جس میں پہلے گھوڑوں پر ان کی برداشت سے زیادہ وزن ڈالا جاتا ہے اور پھریہ دیکھا جاتا ہے ان گھوڑوں میں سے کون کون اپنی منزل پر پہنچتا ہے‘ یہ ریس بانیئے کہلاتی ہے اور یہ جاپان کے علاقے ہوکائیڈو میں صدیوں سے جاری ہے‘ ۔۔اس ریس میں گھوڑوں کواپنی اوقات سے زیادہ وزن اٹھا کر میدان کے دو چکر لگانا پڑتے ہیں۔
مجھے نہ جانے کیوں اپنی حکومت ایک ایسا گھوڑا محسوس ہوتی ہے جس پر اس کی برداشت سے زیادہ وزن ڈال دیا گیا ہے اور دلچسپ بات یہ ہے یہ خود بھی اس بوجھ میں اضافہ کرتی جا رہی ہے مثلاً حکومت کو کس نے کہا تھا یہ نیب کا کام اپنے ذمے لے لے‘ یہ پہلے پاکستان مسلم لیگ ن اور پھر پیپلز پارٹی کی اکاؤنٹیبلٹی شروع کر دے‘ لوگوں کے نام ای اسی ایل پر چڑھا دے اور پھر سپریم کورٹ کے ہاتھوں بے عزتی کرا لے‘ اسے کس نے کہا تھا یہ کشکول نہ اٹھانے کا دعویٰ کرے اور پھر ہمارے وزیراعظم صرف پیسوں کے آسرے پر ولی عہد جی ہاں وزیراعظم یا بادشاہ نہیں صرف ولی عہد کیلئے گاڑی ڈرائیو کرنے پر مجبور ہو جائیں‘ کس نے کہا تھا آپ وزیراعظم ہاؤس کی مہنگی گاڑیاں بیچنے اور وزیراعظم ہاؤس کو تالا لگانے کا اعلان کریں اور پھر خود وزیراعظم ہاؤس کھلوا کر ولی عہد کو اس میں ٹھہرائیں اور مہنگی ترین گاڑی لے کر شہزادے کے استقبال کیلئے ائیرپورٹ پہنچ جائیں اور آپ کو کس نے کہا تھا آپ خودکشی کو آئی ایم ایف کے پاس جانے سے بہتر قرار دیں اور پھر آئی ایم ایف کو منانے کیلئے امریکی شرائط ماننے پر مجبور ہو جائیں‘ میرا خیال ہے حکومت نے غیر ضروری بوجھ اٹھا رکھا ہے اور یہ اس میں اضافے پر اضافہ کرتی چلی جا رہی ہے اور یہ وہ وجہ ہے جس کی بنا پر حکومت نے ساڑھے چار ماہ میں کوئی بڑا فیصلہ نہیں کیا‘ حکومت کو چاہیے یہ بوجھ کم کر کے صرف اور صرف اکانومی پر توجہ دے‘
ہر چیز ٹھیک ہو جائے گی ورنہ یہ اپنے ہی بوجھ تلے کریش کر جائے گی۔ ہم آج کے موضوعات کی طرف آتے ہیں ، سپریم کورٹ نے آج جعلی اکاؤنٹس کا ایشو نیب کے حوالے کر کے دو ماہ میں ازسر نو تفتیش کا حکم دے دیا‘ عدالت نے بلاول بھٹو اور سی ایم سندھ مراد علی شاہ کا نام ای اسی ایل سے بھی ہٹا دیا، کیا آج کا دن حکومت کی سیاسی ناکامی کا دن تھا‘ کیا پیپلز پارٹی گرم پانیوں سے باہر نکل آئی ہے اور کیا آج جے آئی ٹی کی کریڈیبلٹی ختم ہو گئی‘ یہ ہمارا آج کا ایشو ہوگا‘ ہمارے ساتھ رہیے گا۔
