اسلام آباد (این این آئی) وزیراعظم عمران خان نے کابینہ کا خصوصی اجلاس پیر کی صبح ساڑھے دس بجے وزیراعظم آفس اسلام آباد میں طلب کر لیا ٗوفاقی کابینہ کے خصوصی اجلاس میں وزارتوں اور ڈویڑنوں کی کارکردگی پر بریفنگ لی جائے گی۔اجلاس میں وزارتوں اور ڈویژنوں کو اپنی کارکردگی بتانے کا موقع دیا جائے گا۔ ذرائع کے مطابق وزیراعظم فرداً فرداً ہر وزیر، مشیر اور معاونِ خصوصی کی کارکردگی کا جائزہ لیں گے۔ ہر وزارت
اور ڈویژن کو بریفنگ کے لئے 10 منٹ دئیے جائیں گے اور بریفنگ کے بعد 5 منٹ سوالات اور جوابات کے لئے رکھے جائیں گے۔ مختلف وزارتوں اور ڈویڑنوں کی کارکردگی رپورٹ 27 نومبر کو جمع کرائی گئی تھیں۔وفاقی کابینہ کے ارکان کو سو روزہ کارکردگی کی رپورٹس ہمراہ لانے کی ہدایت کی گئی ہے۔ ذرائع کے مطابق کارکردگی تسلی بخش نہ ہونے کی صورت میں وزیراعظم متعلقہ کابینہ رکن کا قلمدان تبدیل کر دیں گے۔
