اسلام آباد (نیوز ڈیسک )وزیر اعظم عمران خان نے کہاہے کہ ملک کی لوٹی ہوئی دولت واپس لانے کے لیے سوئٹزرلینڈ سمیت 26 ممالک سے معاہدے کر لیے ہیں،اس سلسلے میں ہم نے وزیر اعظم ہاؤس میں اثاثہ جات ریکوری کا شعبہ بنایا،کرپشن سے متعلق روز نیا انکشاف ہوتا ہے، سوروز میں 375 ارب روپے کے جعلی اکاؤنٹس پکڑے ، پاکستانیوں کے 11ارب ڈالر کے غیر ملکی قانونی اثاثوں کا سراغ لگایا ہے،
دبئی نے اقامہ رکھنے والوں کے اکاؤنٹس کی تفصیلات نہیں دیں، ابھی مزید بڑی بڑی چیزیں سامنے آرہی ہیں، کرپشن اور غربت کے خاتمے کے لئے اتھارٹی تشکیل د ے رہے ہیں، سرکاری اداروں کی موجودہ حالات کی بنیادی وجہ بھی کرپشن ہے ، غریبوں کے لیے اخوت پروگرام کے تحت 5 ارب روپے تفویض کر دیئے گئے ہیں، اس کے ذریعے غریبوں کے لیے گھر تعمیر کرسکیں گے ، ‘چھوٹے کسان کے لیے لاہور میں بڑی سبزی منڈی کا افتتاح کریں گے، جبکہ 70 ہزار نہروں کو پکا کریں گے جن سے بھاشا ڈیم سے زیادہ پانی کسانوں کو میسر ہوگا، ملک میں سیاحت کو فروغ دے کر غربت کو ختم کرنے کی بھرپور کوشش کریں گے اور اس سلسلے میں قومی سیاحتی شعبہ تشکیل دیا گیا ہے، ملک میں سالانہ 50 ارب روپے کی بجلی چوری ہوتی ہے،اسلام آباد میں قبضہ مافیا سے 350 ارب روپے کی زمین واگزار کرائی ، فیصلہ کیا گیا کہ پاکستان میں ہر غریب انسان کو صحت کارڈ فراہم کیا جائے گا ،نیب میں کوئی ایک چپڑاسی بھی بھرتی نہیں کیا، جو نیب کرتا ہے ہم اس کے ذمہ دار نہیں،نیب اس سے بہت بہتر پرفارم کر سکتاہے، سب کو تنقید برداشت کرنی چاہیے، ہمارا نیب پر کوئی اختیار یا کنٹرول نہیں ،ہم نے ایف آئی اے کو مضبوط کیا، ایف آئی اے نے اب تک 375ارب روپے کے جعلی اکاؤنٹس پکڑے ہیں، یہ وہ اکاؤنٹس ہیں جن میں سے یہ پیسہ آکر آگے گیا، پہلے کمیشن سے پیسہ کمایا وہ جعلی اکاؤنٹ میں گیا اور وہاں سے باہر بھیج دیا گیا،
سوئٹزرلینڈ سے چند سال پہلے کے اکاؤنٹس کی تفصیلات منگوا رہے ہیں، ہم پانامہ سے پہلے کے اکاؤنٹ کی تفصیلات بھی منگوا رہے ہیں، ہم قرضوں میں 6ارب روپے کا روزانہ سود دے رہے ہیں۔ وزیراعظم عمران خان نے کہا کہ 21کروڑ میں صرف 72 ہزار پاکستانی ہیں جو آمدن 2 لاکھ سے زیادہ بتاتے ہیں،جس کی وجہ سے اشیا پر ٹیکس لگا نے سے سارا بوجھ عوام پر پڑھ جاتا ہے،ہم ٹیکس میں اصلاحات لائیں گے اور ایف بی آر کو ٹھیک کرنے کی بھرپور کوشش ہورہی ہے
جب کہ ساتھ ساتھ اسمگلنگ کو روکنا ہے، وہ کمپنیز جن کا شیئر 60 فیصد ہے وہ 98 فیصد ٹیکس دیتے ہیں جب کہ 40 فیصد شیئرز والی کمپنیاں صرف 2 فیصدٹیکس دیتے ہیں، اب تک 26ملکوں کے ساتھ باہمی قانونی معاہدوں پر دستخط کئے ہیں، ان ملکوں میں پاکستانیوں کے 11ارب ڈالر کے غیر ملکی قانونی اثاثوں کا سراغ لگایا ہے، دبئی میں پاکستانیوں کے اکاؤنٹس میں ایک ارب ڈالر سے زائد اثاثے موجود ہیں، دبئی نے اقامہ رکھنے والوں کے اکاؤنٹس کی تفصیلات نہیں دیں، ابھی مزید بڑی بڑی چیزیں سامنے آرہی ہیں۔
