لاہور(اے این این )وزیراطلاعات پنجاب فیاض الحسن چوہان نے کہا ہے کہ کیا ن لیگ کے دور میں شہد کی نہریں بہتی تھیں؟ اعتزاز احسن بزرگ ہیں لیکن وہ سیاسی و ذہنی طور پر ڈسٹرب ہیں۔تحریک انصاف کی حکومت کے 100 دن پورے ہونے پر ن لیگ اور پیپلز پارٹی کی قیادت نے حکمران جماعت کو تنقید کا نشانہ بنایا۔فیاض الحسن چوہان نے ن لیگ کی مریم اورنگزیب اور پی پی رہنما اعتزاز احسن کو اپنے انداز میں جواب دیا ہے۔صوبائی وزیر نے کہا کہ پی ٹی آئی کے یہ 100 دن

ان دونوں جماعتوں کے 50 ہزار دنوں سے بہتر ہیں، عوام کو خوشحالی،کفایت شعاری اور گڈ گورنس کی درست سمت نظر آرہی ہے۔انہوں نے ن لیگی رہنما سے استفسار کیا کہ مریم اورنگزیب بتائیں کیا ان کی حکومت میں عوام کو مرغ مسلم ملتا تھا؟ یا پھر دودھ و شہد کی نہریں بہتی تھیں؟۔فیاض الحسن چوہان نے اعتراز احسن کے بیان کا جواب دیتے ہوئے کہا کہ وہ بزرگ ہیں لیکن آصف زرداری کی وجہ سے سیاسی و ذہنی طور پر ڈسٹرب ہیں اور اپنا غصہ کہیں اور نکال رہے ہیں۔