اسلام آباد (این این آئی) پاکستان پیپلز پارٹی کے چیئرمین بلاول بھٹو زرداری نے کہاہے کہ آسیہ بی بی سے متعلق فیصلے کے بعد قومی اسمبلی سمیت ملک کے تمام اداروں کو سپریم کورٹ کے ساتھ کھڑا ہونا چاہیے ٗانتہا پسندی ہمارا بڑا مسئلہ ہے ٗ تمام جماعتوں نے مل بیٹھ کر نیشنل ایکشن پلان بنایا تھا ٗ موجودہ حکومت بھی اس عمل نہیں کررہی ہے ٗہم سڑکوں سے ملک کو نہیں چلا سکتے ٗ آئین اور قانون کے تحت ہی ملک چل سکتا ہے۔ بدھ کو میڈیا سے بات کرتے ہوئے بلاول بھٹو زرداری نے کہا کہ انتہا پسندی ہمارا بڑا مسئلہ ہے،

تمام جماعتوں نے مل بیٹھ کر نیشنل ایکشن پلان بنایا تھا لیکن بدقسمتی سے سابقہ حکومت اور نہ ہی موجودہ حکومت اس پر عمل درآمد کر رہی ہے۔انہوں نے کہا کہ جوڈیشل ایکٹوازم سے متعلق ہماری سوچ ہوسکتی ہے، سپریم کورٹ ہمارا قومی ادارہ ہے ٗقومی اسمبلی سمیت تمام ادارے سپریم کورٹ کے ساتھ کھڑے ہونے چاہیے، ہم سڑکوں سے ملک کو نہیں چلا سکتے اور آئین اور قانون کے تحت ہی ملک چل سکتا ہے۔انہوں نے کہا کہ اس دن کے انتظار میں ہوں جب پورا ملک قانون کے تحت چلے گا، دھمکی سے نہیں۔