اسلام آباد (نیوز ڈیسک) سابق وزیراعظم یوسف رضا گیلانی نے کہا ہے کہ چار وزیراعظم عدالتوں میں پیش ہوچکے ہیں‘ پانچواں وزیراعظم بھی احتساب عدالت آئے گا۔ پیر کو نواز شریف اور یوسف رضا گیلانی کی احتساب عدالت میں پیشی کے دوران ملاقات ہوئی۔ سابق وزرائے اعظم نے ایک دوسرے کا حال احوال پوچھا، اس موقع پر میڈیا سے گفتگو کرتے ہوئے یوسف رضا گیلانی نے کہا کہ چار وزیراعظم عدالتوں میں پیش ہوچکے ہیں پانچواں
وزیراعظم بھی احتساب عدالت آئے گا، انہوں نے کہا کہ نیب کا ادارہ بااختیار اور آزاد ہونا چاہئے، وزیراعظم کو یہ نہیں کہنا چاہئے کہ میں فلاں کو پکڑوں گا، میں نے جیل مینول کے مطابق دس سال جیل کاٹی، فیصلے میرے حق میں ہوئے تو میرے دس سالوں کا جواب کون دے گا،مجھے باعزت بری کیا گیا تو میں وزیراعظم بن گیا۔ نوازشریف مسلسل ان کی باتیں سن کر مسکراتے رہے جبکہ یوسف رضاگیلامی کے چہرے پر بھی مسکراہٹ تھی۔
