اسلام آباد(مانیٹرنگ ڈیسک)اسٹیبلشمنٹ سے تعلقات میں بہتری سے متعلق رانا مشہود کا بیان، نواز شریف کا بھی ردعمل سامنے آگیا۔ تفصیلات کے مطابق ن لیگ کے رانا مشہود کی جانب سے ن لیگ کی قیادت کیساتھ اسٹیبلشمنٹ سے تعلقات میں بہتری سے متعلق بیان کے بارے میں نواز شریف کا بھی ردعمل سامنے آگیا ہے ۔ اسلام آباد کی احتساب عدالت میں صحافیوں سے غیر رسمی گفتگو کے دوران نواز شریف سے صحافی نے سوال کیا کہ رانا مشہود کے بیان پر آپ کیا کہیں گے، جس پر انہوں نے

کہا کہ شہباز شریف اس پر نوٹس لے چکے ہیں۔ صحافی نے سوال کیا، رانامشہود کا بیان پارٹی پالیسی تھی یا کچھ اور؟ جس پر انہوں نے کہاکہ آپ اس بارے میں بہتر جانتے ہیں۔ایک اور سوال پر نواز شریف نے شعر کی صورت میں ردعمل دیتے ہوئے کہا کہ ’غالب ہمیں نہ چھیڑ کہ پھر جوش اشک سے، بیٹھیں ہیں ہم تہیہ طوفاں کیے ہوئے‘۔ انہوں نے مزید سیاسی گفتگو سے گریز کرتے ہوئے کہا کہ میرا ذہن کسی اور کیفیت میں ہے اور آپ مجھ سے سیاسی سوال پوچھ رہے ہیں۔