لاہور (ا ین این آئی) لاہور کی احتساب عدالت کے باہر 2خواتین وکلاء نے ایک مرد وکیل کی سر عام خوب پٹائی کر دی۔بتایا گیا ہے کہ دونوں خواتین بہنیں تھیں جنہوں نے تجمل نامی وکیل پر الزام عائد کیا کہ اس نے ان کی کردار کشی اور ہراساں کرنے کی کوشش کی ہے۔دونوں بہنوں نے وکیل تجمل پر تھپڑوں، گھونسوں کی بارش کی اور خوب شور مچایا۔اس دوران تجمل کے ساتھی وکلاء اور دیگر افراد نے انہیں چھڑانے

کی کوشش بھی کی لیکن وہ ایسا کرنے میں ناکام ہوئے۔لڑائی میں ایک مرد وکیل نے خاتون وکیل کومارنے کی بھی کوشش کی جبکہ دونوں جانب سے بدزبانی بھی کی گئی۔خاتون وکیل نادیہ کا کہنا تھا کہ تجمل انہیں ہراساں اور ان کی کردار کشی کرتا تھا۔اس دوران وکلا، میڈیا نمائندوں کو ویڈیوز بنانے پر سنگین نتائج کی دھمکیاں بھی دیتے رہے۔بتایا گیا ہے کہ نادیہ اور تجمل احتساب عدالت میں 2فریق پارٹیوں کے وکیل ہیں۔