فیصل آباد(آن لائن ) شہریوں اور تاجروں کے مطالبہ پر فیصل آباد سے لاہور ایک بار پھر نان سٹاپ ٹرین چلانے کا اعلان ،یکم اکتوبر سے آٹھ کوچز پر مشتمل نئی نان سٹاپ ٹرین دو گھنٹوں میں لاہور سے فیصل آباد کا سفر طے کرے گی،عام شہریوں اور تاجروں کے لئے آسانی ہوگی۔ آن لائن کے مطابق نان سٹاپ آٹھ کوچز پر مشتمل اس ٹرین میں پانچ اکانومی،ایک اے سی پارلر،ایک اے سی سٹینڈرڈ اور ایک بزنس کلاس بوگی ہوگی۔

یہ ٹرین صبح آٹھ بجے لاہور سے اور 12بجے دوپہرفیصل آباد سے روانہ ہوگی یاد رہے اس سے قبل فیصل آباد سے لاہور کیلئے سابق صدر ضیاء الحق اور بے نظر بھٹو کے دورحکومت میں تین نا ن سٹاپ ٹرین فیصل آباد تاجروں اور شہریوں کیلئے ہوتی تھیں جوکہ 2012سابق وزیر اعظم یوسف رضاگیلانی کے دورہ حکومت میں بند ہوئی ۔ اس وقت لاہور فیصل آباد کے درمیان کوئی نان سٹاپ ٹرین نہیں چل رہی تھی پریم یونین کے مطالبہ پر حکومت نے فیصل آباد کے شہریوں ایک اور دیرینہ مطالبہ تسلیم کرلیا،ریلوے پریم یونین کے راہنماؤں شیخ محمد انور اور خالد محمود چوہدری نے وفاقی وزیر ریلوے شیخ رشیداحمد،چیف ایگزیکٹو ریلوے آفتاب اکبر کا شکریہ ادا کرتے ہوئے مطالبہ کیا ہے کہ پشاور سے کراچی کے لئے جاری ہونے والی نئی عوامی ٹرین کو بھی براستہ فیصل آبادچلایا جائے۔ریلوے پریم یونین کے رہنماؤں نے بتایا کہ،نئی ٹرین کے اجراء سے فیصل آباد کے تاجروں کو اپنے کاروباری سفر کے لئے لاہور جانا بے حد آسان ہوجائے گا،اس ٹرین کے اجراء سے شہریوں کی مشکلات میں کمی ہونے کے ساتھ ساتھ ریلوے کے ریونیومیں بھی خاطر خواہ اضافہ ہو گا جس سے موجودہ حکومت کا ریلوے کو خسارہ سے نکالنے کا خواب پورا ہونے میں بھی مدد حاصل ہوگی۔پریم یونین کے رہنماؤں نے مطالبہ کیا ہے کہ پشاور سے کراچی کے لئے چلنے والی نئی ٹرین کو براستہ فیصل آبادچلایا جائے تاکہ فیصل آباد کے لاکھوں مسافر بھی اس سے استفادہ حاصل کر سکیں گے۔ انہوں نے کہا کہ فیصل آباد پاکستان کا تیسرا بڑا شہر ہے جہاں سے ریلوے کو سب سے زیادہ ریونیو مل رہا ہے ،فیصل آبادسے روزانہ ہزاروں شہری اور کاروباری افراد کراچی کے لئے سفر کرتے ہیں ۔