لاہور(این این آئی) میڈیا رپورٹ کے مطابق نیب کے مجرم میاں نوازشریف ، کیپٹن(ر) محمد صفدر اور مریم نواز کی 19 ستمبر 2018کی رہائی کے وقت انٹی نارکوٹکس فورس کے مجرم حنیف عباسی کی میاں نوازشریف اور دوسروں کے ساتھ تصاویر کو بہت سے الیکٹرانک میڈیا پر براہ راست دکھانے کے ساتھ ساتھ سوشل میڈیا پر بھی جاری کیاگیا ۔انٹی نارکوٹکس کے مجرم حنیف عباسی کو سپرنٹنڈنٹ سنٹرل جیل راولپنڈی کے آفس میں بھی دیکھا گیا۔اس خبر کی نشرواشاعت نے پنجاب حکومت اور
محکمہ جیل خانہ جات کے نام اور امیج کو بری طرح متاثر کیاہے ۔لہذا اس خبر کا نوٹس لیتے ہوئے آئی جی جیل خانہ جات پنجاب مرزا شاہد سلیم بیگ نے ڈی آئی جی جیل خانہ جات ریجن ملتان ملک شوکت فیروز اور اے آئی جی (جوڈیشل)جیل خانہ جات لاہور ملک صفدر نواز پر مشتمل دو رکنی انکوائری کمیٹی تشکیل دی ہے جوکہ اس معاملے کی حقائق پر مبنی انکوائری کرکے تین دن میں اپنی رپورٹ پیش کرے گی تاکہ اس معاملے میں ملوث افسران/ اہلکارو ں کے خلاف محکمانہ کارروائی کی جاسکے ۔
