اسلام آباد (مانیٹرنگ ڈیسک)نواز شریف کی رہائی اور میثاق جمہوریت میں بیگم کلثوم نواز کا اہم کردار تھا، معروف صحافی و تجزیہ کار سہیل وڑائچ نے برسوں بعد اہم را ز سے پردہ اٹھا دیا۔ تفصیلات کے مطابق معروف صحافی و تجزیہ کار سہیل وڑائچ نے نجی ٹی وی پروگرام میں گفتگو کرتے ہوئے بیگم کلثوم نواز کو زبردست الفاظ میں خراج تحسین پیش کیا ہے۔ سہیل وڑائچ کا کہنا تھا کہ بیگم کلثوم نواز نہایت باہمت اور بہادر خاتون تھیں۔ اے آرڈی کی تشکیل میں

ان کا بڑاکردار تھا جبکہ پیپلزپارٹی اور مسلم لیگ ن کے درمیان مفاہمت اور میثاق جمہوریت سائن ہونے میں بھی کلثوم نواز نے اہم کردار ادا کیا۔ سہیل وڑائچ کا کہنا تھا کہ میں نے کتاب لکھ کر نواز شریف کو پیش کی تو انہوں نے اسے پڑھنے کے بعد شائع کرنے سے انکار کر دیا لیکن جب میں نے یہی کتاب بیگم کلثوم نواز کو دی تو انہوں نے نواز شریف سے کہا کہ یہ بہت اچھی کتاب ہے اس لئے اس کی اشاعت کروائیں یوں میری کتاب کی اشاعت میں بھی انہوں نے اہم کردار ادا کیا تھا۔