لاہور( این این آئی)سابق وزیر اعظم محمد نواز شریف کی اہلیہ کلثوم نواز کے انتقال کی خبر ملتے ہی خاندان کے افراد ،عزیز اقارب ،پارٹی رہنما اور کارکن جاتی امراء رائے ونڈ پہنچنا شروع ہو گئے ،اہم شخصیات کی آمد کے پیش نظر پولیس کی سکیورٹی بھی تعینات کر دی گئی ۔ تفصیلات کے مطابق سابق وزیراعظم محمد نواز شریف کی اہلیہ بیگم کلثوم نواز کے لندن میں انتقال کر جانے کی خبر ملتے ہی شریف خاندان
اور بیگم کلثوم نواز کے خاندان کے افراد فوری طور پر جاتی امراء رائے ونڈ پہنچ گئے اور ایک دوسرے سے گلے لگ کر روتے رہے ۔ مسلم لیگ (ن) کے رہنما، اراکین اسمبلی اور کارکنوں کی بڑی تعداد بھی جاتی امراء پہنچ گئی اور ایک دوسرے سے تعزیت اور گلے لگ کر روتے ہوئے دکھائی دئیے ۔ اعلیٰ شخصیات کی آمد کے پیش نظر پولیس کی بھاری نفری کو سکیورٹی کے لئے تعینات کر دیاگیا ۔
