ملتان(این این آئی)پاکستان تحریک انصاف کے رکن قومی اسمبلی نصراللہ دریشک نے ڈپٹی کمشنر راجن پور کی جانب سے خود پر لگائے الزامات مسترد کردیئے ہیں۔میڈیا رپورٹ کے مطابق ڈپٹی کمشنر راجن پور اللہ دتہ نے الزام عائد کیا تھا کہ پی ٹی آئی کے رکن قومی اسمبلی نصراللہ دریشک اور ان کے صاحبزادے صوبائی وزیر سردار حسنین بہادر دریشک کی جانب سے محکمہ مال اور بارڈر ملٹری پولیس میں تبادلے و تقرریوں کے لئے دباؤ ڈالا جارہا ہے تاہم نصراللہ دریشک نے

ان الزامات کو یکسر مسترد کردیا ہے۔نصراللہ دریشک نے کہاکہ ڈپٹی کمشنر راجن پور پہلے یہ واضح کریں کہ کیا پٹواری کا تبادلہ ڈپٹی کمشنر کرتا ہے؟ عام فہم بات ہے کہ پٹواری کا تبادلہ ڈپٹی کمشنر نہیں کرتا اور کیا میں ایک پٹواری کا تبادلہ کروانے کیلئے چل کر ڈپٹی کمشنر کے پاس جاؤں گا۔نصراللہ دریشک نے کہا کہ کیا ڈپٹی کمشنر کو عوام کا کوئی کام کہنا الزام کی بات ہے ٗ ڈپٹی کمشنر راجن پور کے بارے میں جاننا چاہتے ہیں تو حافظ آباد والوں سے جاکر پوچھیں۔