اسلام آباد(مانیٹرنگ ڈیسک)تحریک انصاف کی حکومت نے اقتصادی مشاورتی کونسل میں قادیانی عاطف میاں کی نامزدگی کا فیصلہ واپس لینے کا اعلان کر دیا۔ تفصیلات کے مطابق سماجی رابطوں کی ویب سائٹ ٹویٹر پر وفاقی وزیر اطلاعات فواد چوہدری نے عاطف میاں کی نامزدگی واپس لینے کا اعلان کرتے ہوئے اپنے پیغام میں کہا ہے کہ’’ حکومت نے فیصلہ کیا ہے کہ عاطف میاں
کی اقتصادی مشاورتی کمیٹی سے نامزدگی واپس لے لی جائے،حکومت علماء اور تمام معاشرتی طبقات کو ساتھ لے کر ہی آگے بڑھنا چاہتی ہے اور اگر ایک نامزدگی سے مختلف تاثر پیدا ہوتا ہے تو یہ مناسب نہیں۔عمران خان کا آئیڈیل ریاست مدینہ ہے، اور وزیر اعظم اور ان کی کابینہ کے اراکین عاشقان رسول کریم صلی اللہ علیہ وآلہ وسلم ہیں۔ ختم نبوت ہمارے ایمان کا حصہ ہے اور حال ہی میں گستاخانہ خاکوں کے معاملے پر حکومت نے جو کامیابی حاصل کی وہ بھی اسی نسبت کا اظہار ہے۔‘‘واضح رہے کہ وفاقی وزیر اطلاعات کی ٹویٹ سے قبل تحریک انصاف کے سینیٹر فیصل جاوید نے سماجی رابطوں کی ویب سائٹ پر اپنے ایک پیغام میں کہا ہے کہ ’’عاطف میاں سے مستعفی ہونے کا کہا گیا تھا جس پر وہ رضامند ہو گئے ہیں جس کے بعد ان کی جگہ نئے رکن کی تعیناتی کا اعلان بعد میں کیا جائیگا‘‘۔واضح رہے کہ گزشتہ چند روز سے معاشی مشاورتی کونسل کی تشکیل کے وقت قادیانی عاطف میاں کی تقرری کو لیکر ملک کی مذہبی جماعتوں اور عوامی حلقوں میں شدید بے چینی پائی جا رہی تھی اور اس حوالے سے حکومت کو تنقید کا بھی سامنا تھا تاہم عاطف میاں کی تعیناتی کا حکومت نے بھرپور طریقے سے دفاع کیا ۔اس سے قبل ایک پریس کانفرنس میں فواد چوہدری کا کہنا تھا کہ عاطف میاں کو اقتصادی مشاورتی کونسل میں نامزد کیا گیا ہے ان کو اسلامی نظریاتی کونسل میں تو نہیں تعینات کیا ۔
