اسلام آباد (مانیٹرنگ ڈیسک) بشریٰ بی بی کا اثرو رسوخ کام کر گیا، ن لیگ کو زبردست دھچکا، اہم ترین رہنما ن لیگ چھوڑ کر پی ٹی آئی میں شامل ہو گیا۔ تفصیلات کے مطابق چیئرمین تحریک انصاف کی تیسری اہلیہ بشریٰ بی بی کی صاحبزادی مہرو حیات نے چند روز قبل تحریک انصاف میں شمولیت اختیار کی ہے جس کی خبر نمایاں طورپر پرنٹ اور الیکٹرانک میڈیا میں
نشر اور شائع ہوئی تاہم اب امکان ظاہر کیا جا رہا ہے کہ مہرو حیات کے شوہر اور بشریٰ بی بی کے داماد میاں حیات مانیکا بھی پاکستان تحریک انصاف میں شمولیت اختیار کرنے جا رہے ہیں۔ واضح رہے کہ مہرو حیات کے شوہر تحریک انصاف کے امیدوار برائے قومی اسمبلی کے اتحادی کے طور پر الیکشن میں سامنے آئے تھے اور انہوں نے تحریک انصاف کے امیدوار سے مقامی سطح پر اتحاد قائم کرتے ہوئے الیکشن لڑا تھا ۔ ذرائع کے مطابق میاں حیات مانیکا جلد ہی پی ٹی آئی میں شمولیت اختیار کر سکتے ہیں، خیال رہے کہ میاں حیات مانیکا کی ساس اور عمران خان کی اہلیہ بشریٰ بی بی نے اپنے داماد کو تحریک انصاف کے ٹکٹ پر الیکشن لڑنے کی بھی پیش کش کی تھی تاہم میاں حیات مانیکا نے ن لیگ کے ٹکٹ پر ہی الیکشن میں حصہ لیا تھا۔ ذرائع کے مطابق سابق صوبائی وزیر میاں عطا مانیکا کی بہو مہرو حیات کی پاکستان تحریک انصاف میں شمولیت کے بعد اس خاندان کو بھی حکومت میں جگہ ملنے کے امکانات روشن ہو گئے ہیں۔یہاں یہ بات بھی قابل ذکر ہے کہ بشریٰ بی بی کے ماننے والوں میں کئی اہم شخصیات شامل ہیں جن کا تعلق شوبز، سیاست اور کھیلوں سے بتایا جاتا ہے اور بشری بی بی نے الیکشن میں اس حوالے سے اپنا اثرورسوخ بھی تحریک انصاف کی جیت کیلئے استعمال کرتے ہوئے اپنے ماننے والوں کو تحریک انصاف کی حمایت کا کہا تھا۔
