اسلام آباد(سی پی پی )صدر مملکت ممنون حسین نے چا روں صوبوں سے تعلق رکھنے والے ضرورت مند آرٹسٹوں ، ادیبوں اور فن کاروں کے لیے ایک کروڑ روپے سے زائدکی امداد کی منظوری دے دی۔۔صدر مملکت نے یہ منظوری ایوان صدر میں منعقدہ ویلفیئر آرٹسٹس فنڈ کی اسٹیرنگ کمیٹی کے آٹھویں اجلاس میں دی۔صدر مملکت نے کہا کہ و ہ اپنے دورانیے کے آخری اجلاس کی صدارت کر رہے ہیں۔
انہوں نے توقع ظاہر کی ویلفیئر فنڈ آئندہ بھی ضرورت مندفنکاروں کی امداد جاری رکھے گا۔ انھوں نے اجلاس میں شریک تمام ممبران اور مخیر حضرات کا شکریہ ادا کیا کہ جنھوں نے اس کار خیر میں حصہ لیا اورفنکاروں کے مسائل کم کرنے میں عملی مدد کی۔صدر مملکت نے کہا کہ ادیب ، شاعر اور فنکار معاشرے کا قابل قدر حصہ ہیں جو وطن عزیز کا مثبت پہلو اجاگر کرتے ہیں۔انھوں نے کہا کہ ضرورت کے وقت معاشرے کو ان کے کام آنا چاہیے۔ صدر مملکت نے کہا کہ وفاقی حکومت کے آرٹسٹس ویلفیئر فنڈمیں اضافہ کیا جائے گا۔
