اسلام آباد(آئی این پی )پاکستان تحریک انصاف کے چیئرمین عمران خان سے سربراہ جمہوری وطن پارٹی شاہ زین نے ملاقات کی اور اپنے مطالبات عمران خان کے سامنے رکھے ، عمران خان کی جانب سے تمام جائز مطالبات تسلیم کرنے کی یقین دہانی کرائی گئی ۔ منگل کو بنی گالہ میں عمران خان سے شاہ زین بگٹی نے ملاقات کی ۔ ملاقات میں شاہ زین بگٹی نے اپنے مطالبات عمران خان کے سامنے رکھے ۔ عمران خان نے تمام جائز مطالبات تسلیم کرنے کی یقین دہانی کراتے ہوئے کہا کہ بلوچستان کے
لوگوں کا احساس محرومی ختم کریں گے ،بلوچستان کو قومی دھارے میں لائیں گے ۔ رہنما پی ٹی آئی جہانگیر بھی ملاقات میں چیئرمین تحریک انصاف کے ہمراہ موجود تھے ۔ عمران خان سے ملاقات کے بعد میڈیا سے گفتگو کرتے ہوئے شاہ زین بگٹی نے کہا کہ وزیراعظم کیلئے عمران خان کی حمایت کریں گے ، عمران خان سے بلوچستان کی صورتحال اور بگٹی قبائل کی بلوچستان میں واپسی پر بات چیت ہوئی ۔ انہوں نے کہا کہ کچھی کینال پراجیکٹ سمیت دیگر امور پر بھی عمران خان سے گفتگو ہوئی ہے
