اوکاڑہ (آن لائن ) مسلم لیگ (ن )کے ایم این اے چوہدری ریاض الحق نے کہا ہے کہ دھاندلی کے خلاف ساری اپوزیشن کا اتحا د سیاسی استحکام کی نوید دیتا ہے لاڈلے نے اقتدارکے ایوانوں میں داخل ہونے سے پہلے ہی کشکول اٹھانے کا عندیہ دے دیا ہے جو کہ تازہ ترین یو ٹرن ہے ان خیالات کااظہار انہوں نے ،سابق سٹی ناظم حاجی محمد نصراللہ کے ڈیرہ 49ٹو ایل اوکاڑہ میں صحافیوں سے گفتگو کر تے ہو ئے کیا،چوہدری ریاض الحق نے کہا ہے کہ اقتدار کے حواری پریشان ہیں کہ ان کو اتنی زیادہ اکثریت کس طرح مل گئی اس کے باوجود بھان متی کا کنبہ جوڑے

بغیر وزارت اعظمیٰ کا عہدہ ملنے والا نہیں جن کے خلا ف کل تک عمران خان گالی کے ساتھ بیان داغتے تھے آج ان کے چرنوں میں بیٹھ کر کرسی اقتدار حاصل کرنا چاہتے ہیں انہوں نے کہاکہ اپوزیشن کی جماعتوں نے ایک دوسرے کے خلاف اپنے اپنے منشور کے ساتھ انتخابی میدان میں جوہر دکھائے آج ساری اپوزیشن ایک نقاطی ایجنڈا پر متحد ہے کہ ملک کو سیاسی استحکام بخشا جائے انہوں نے کہاکہ آئی ایم ایف کے پاس نہ جانے کا اعلان کر نے والی پی ٹی آئی ابھی اقتدار کے ایوانوں میں داخل نہیں ہوئی لیکن بھیک مانگنے کے لئے کشکول اٹھا لیا ہے