اسلام آباد (آئی این پی) پاکستان تحریک انصاف کے وائس چیئرمین شاہ محمود قریشی نے کہا ہے کہ ہم سمجھتے ہیں بی این پی کے 6نکات پر پیش رفت ممکن ہے ، بی این پی 18سال سے جدوجہد کر رہی ہے ، پیپلزپارٹی اور (ن) لیگ نے ان کے مسائل حل نہیں کئے ، آزمائے ہوئے کو آزمانہ عقلمندی نہیں بی این پی رہنما جہانزیب جمالدینی نے کہا کہ بی این پی مینگل 18سال سے نکات پیش کر رہی ہے مگر ان نکات کو ماننے کی صلاحیت کسی میں نہیں دیکھی،

امید ہے پی ٹی آئی نکات پر پیش رفت کرے گی ۔ ہفتہ کو پی ٹی آئی اور بی این پی کے وفد کے درمیان ملاقات ہوئی جس کے بعد میڈیا سے گفتگو کرتے ہوئے شاہ محمود قریشی نے کہا کہ ہماری ملاقات اچھی رہی ہے ، ہم اس نتیجے پر پہنچے ہیں کہ بی این پی کے 6نکات پر غور وفکر کیا جا سکتا ہے ، آزمائے ہوئے کو آزمانہ عقلمندی نہیں ، عمران خان دو ٹوک بات کرتے ہیں ، ملکی مفاد میں کپتان بڑے سے بڑا قدم اٹھانے کی بھی صلاحیت رکھتے ہیں ۔انہوں نے کہا کہ آج کی نشست کے بارے میں عمران خان کو آگاہ کروں گا ، بی این پی مینگل 18سال سے جدوجہد کر رہی ہے ، گزشتہ 18سال سے تحریک انصاف کی حکومت نہیں تھی ، پیپلزپارٹی اور (ن) لیگ نے بی این پی کے مسائل نہیں کئے ،ہم پہلی بار وفاق میں حکومت بنا رہے ہیں ۔شاہ محمود قریشی نے کہا کہ کل بھی ا ور آج بھی بھتہ خوری کے خلاف ہیں ، کراچی کے لوگوں نے تحریک انصاف کو مینڈیٹ دیا ، کراچی کے لوگوں کے ساتھ ہاتھ ملائے بغیر کراچی کے مسائل کا حل ممکن نہیں ہے ۔ بی این پی کے رہنما نے میڈیا سے گفتگو میں کہا کہ جمہوریت کیلئے مذاکرات سے مسائل حل کریں گے ، ہم ایک نتیجہ خیز ڈائیلاگ کی طرف جا رہے ہیں ۔ جہانزیب جمالدینی نے کہا کہ بی این پی مینگل 18سال سے نکات پیش کر رہی ہے مگر ان نکات کو ماننے کی صلاحیت کسی میں نہیں دیکھی ، امید ہے پی ٹی آئی قیادت نکات پر پیش رفت کرے گی ، امید ہے ہم مسائل کے حل تک پہنچ جائیں گے ۔