اسلام آباد(این این آئی)وفاقی وزیر برائے نجکاری، سرمایہ کاری بورڈ، اور مواصلات عبد العلیم خان سے وزیرِ اعلیٰ گلگت بلتستان گلبر خان نے ملاقات کی اور شمالی علاقہ جات میں نیشنل ہائی وے اتھارٹی کے کردار، ذرائع مواصلات کو وسعت دینے اور ذرائع آمدورفت کو مزید بہتر بنانے کے امور پر بات چیت کی۔

وفاقی وزیر عبدالعلیم خان نے کہا کہ شمالی علاقہ جات سیاحت کے لئے اپنی مثال آپ ہیں، گلگت بلتستان کی ترقی پاکستان کی خوشحالی کے ساتھ منسوب ہے اور ہم نیشنل ہائی وے اتھارٹی کے ذریعے ان علاقوں میں روڈ نیٹ ورک کی بہتری کے لئے پر عزم ہیں۔ انہوں نے کہا کہ ہر سال ہزاروں سیاح گلگت بلتستان کا رخ کرتے ہیں جو ان علاقوں کی معیشت میں نمایاں کردار ادا کرتے ہیں۔ اس تناظر میں وفاقی وزیر نے سیاحوں کے لیے ٹول ٹیکس متعارف کرانے کی تجویز دی جس سے حاصل ہونے والا ریونیو این ایچ اے کے روڈ انفراسٹرکچر کی بہتری پر خرچ کیا جائے گا۔ تاہم انہوں نے واضح کیا کہ گلگت بلتستان کے مقامی باشندے اس ٹول ٹیکس سے مستثنیٰ ہوں گے۔وزیرِ اعلیٰ گلگت بلتستان گلبر خان نے وفاقی وزیر کے ترقیاتی اقدامات کی تعریف کی اور اس عزم کا اظہار کیا کہ صوبائی حکومت این ایچ اے کے ساتھ مل کر خطے کی ترقی کے لیے بھرپور تعاون کرے گی۔

پاکستان میں آذربائیجان کے سفیر خضر فرہادوف سے ملاقات کے دوران وفاقی وزیر عبد العلیم خان نے دونوں ممالک کے درمیان اقتصادی تعلقات کو مزید مضبوط بنانے پر زور دیا۔ انہوں نے پاکستان میں آذربائیجان کی سرمایہ کاری میں دلچسپی کو سراہا، خاص طور پر انفراسٹرکچر ڈویلپمنٹ کے شعبے میں انہوں نے اس بات کو اجاگر کیا کہ پاکستان میں سرمایہ کاری کے بہترین مواقع موجود ہیں اور خصوصی طور پر Mـ6 اور Mـ9 موٹرویز جیسے بڑے روڈ پراجیکٹس میں سرمایہ کاری دونوں ممالک کے لیے فائدہ مند ہو سکتی ہے۔وفاقی وزیر عبد العلیم خان نے وزیرِ اعظم شہباز شریف کے متوقع دورہ آذربائیجان پر گفتگو کرتے ہوئے زور دیا کہ اب وقت آ گیا ہے کہ اہم سرمایہ کاری معاہدوں پر عملدرآمد کیا جائے۔

انہوں نے آذربائیجان کے سرمایہ کاروں کو مکمل سہولتیں فراہم کرنے کی یقین دہانی کرائی۔آذربائیجان کے سفیر خضر فرہادوف نے پاکستان کے اقدامات کا خیر مقدم کیا اور دونوں ممالک کے درمیان تعلقات کو مزید مستحکم کرنے کے عزم کا اظہار کیا۔ انہوں نے وزیرِ اعظم شہباز شریف کے دورے کو دو طرفہ اقتصادی تعاون کے فروغ کے لیے ایک اہم قدم قرار دیا۔یہ ملاقاتیں اس بات کی عکاس ہیں کہ پاکستان خطے کی ترقی اور غیر ملکی سرمایہ کاری کو فروغ دینے پر توجہ مرکوز کیے ہوئے ہے، اور حکومت انفراسٹرکچر، سیاحت، اور تجارتی شراکت داری کو مزید مضبوط بنانے کے لیے سرگرم عمل ہے۔