ممبئی (این این آئی)بھارت کی خوبرو اداکارہ ترپتی ڈمری نے بھارت کی سب سے زیادہ سرچ کی جانے والی شخصیات میں دپیکا پڈوکون اور عالیہ بھٹ کو بھی پیچھے چھوڑتے ہوئے پہلا نمبر حاصل کرلیا ہے۔انٹرٹینمنٹ رینکنگ اور انفارمیشن کی ویب سائٹ آئی ایم ڈی بی نے 2024 کیلیے سب سے مشہور ہندوستانی فلمی شخصیات کی فہرست جاری کی ہے جس میں ترپتی ڈمری نے حیرت انگیز طور پر بالی ووڈ کنگ شاہ رخ خان، دیپیکا پڈوکون اور عالیہ بھٹ سمیت تفریحی دنیا کی کچھ مشہور شخصیات کو پیچھے چھوڑ کر سرفہرست مقام حاصل کیا ہے۔

انٹرنیٹ مووی ڈیٹا بیس (آئی ایم ڈی بی) کی سب سے زیادہ سرچ کی جانے والی ٹاپ ٹین شخصیات میں ترپتی ڈمری کے بعد، دوسرے نمبر پر دیپیکا پڈوکون، ایشان کھتر، شاہ رخ خان اور سوبھیتا دھولی پالا رہے، جبکہ شروری واگھ، ایشوریہ رائے اور سمانتھا روتھ پربھو بالترتیب چھٹے، ساتویں اور آٹھویں نمبر پر ہیں۔ فہرست میں عالیہ بھٹ اور پربھاس نے نویں اور دسویں پوزیشن حاصل کی ہے۔آئی ایم ڈی بی نے اپنی انسٹاگرام پوسٹ میں ناموں کا اعلان کرتے ہوئے لکھا کہ ”انتظار ختم ہوگیا! 2024 کے سب سے مشہور ہندوستانی ستارے پیش کررہے ہیں، جنھوں نے آئی ایم بی ڈی سرچ میں ہماری اسکرینوں کو روشن کیا۔ کیا آپ کے پسندیدہ ستاروں نے اس فہرست میں جگہ حاصل کی؟”