ممبئی(این این آئی) بالی ووڈ کے چلبے اداکار رنویر سنگھ ڈانس شو کی تقریب کے دوران خود پر قابو نہ رکھ سکے اور بْری طرح رونے لگے۔بھارتی میڈیا رپورٹس کے مطابق رنویر سنگھ اور عالیہ بھٹ نے نئی آنے والی فلم’’گلی بوائے‘‘ کی تشہیر کے لئے مشہورڈانس شو ’’سپر ڈانسر‘‘ میں شرکت کی۔

جہاں بچوں کی جانب سے مہمان کی شرکت کو منفرد بنانے کے لئے رنویر کی سوانح حیات کو ڈانس کے ساتھ پیش کیا گیا۔ اس ڈانس پر فارمنس میں رنویر کے فلمی نگری میں قدم رکھنے سے قبل سے لیکر کامیابی کے تمام ادوار کو اجاگر کرنے کی بھرپور کوشش کی گئی۔بچوں کی جانب سے پیش کردہ داستان کو دیکھ کر رنویر سنگھ خود پر قابو نہ رکھ سکے اور بلک بلک کر رونے لگے حتیٰ کہ عالیہ بھٹ سمیت دیگر فنکار بھی جوشیلے رنویر کو اس طرح روتے دیکھ کر پریشان ہو گئے اور انہیں دلاسا دیا۔رنویر سنگھ نے آبدیدہ انداز میں رونے کی وجہ بتاتے ہوئے کہا کہ ’میں نے کبھی نہیں سوچھا تھا کہ میں کبھی اس ڈانس شو میں بھی آؤں گا اور کوئی میری پوری زندگی کو ڈانس کے ذریعے بیان کرے گا، میرے لئے کئے گئے اس اقدام نے میرے دل کو بہت متاثر کیا ہے۔گلی بوائے نے کہا کہ ایسا لگتا ہے وقت ایک دم تبدیل ہوگیا کیوں کہ گزشتہ سال میں نے سپرہٹ فلمیں کیں اور پھر رشتہ ازدواج میں بندھ گیا اور یہ سب دیکھ کرایسا محسوس ہوتا ہے کہ جیسے یہ سب کچھ ایک خواب ہے،یہی وجہ ہے کہ اپنی ہی زندگی کی کہانی دیکھ کر آنسوؤں کو روک نہیں سکا۔واضح رہے کہ ’’گلی بوائے‘‘ کی ہدایات معروف اداکار فرحان اختر کی بہن زویا اختر نے دی ہے جب کہ فلم کی کہانی ممبئی کے اسٹریٹ ریپر کی زندگی کے گرد گھومتی ہے، فلم رواں ماہ 14 فروری کو سنیما گھروں کی زینت بنے گی۔

موضوعات:رنویرسنگھ