کراچی(آن لائن)عالمی مارکیٹ میں گزشتہ روز سونے کی فی اونس قیمت میں 15ڈالرز کی کمی ہوئی اور سونے کی فی اونس قیمت 1227ڈالر کی سطح پر رہی۔ عالمی مارکیٹ میں سونے کے نرخوں میں کمی کے باعث مقامی سطح پر بھی سونے کی قیمتوں میں کمی رہی اور فی تولہ سونے کی قیمت300روپے کمی سے 50300،دس گرام سونے کی قیمت 257روپے کمی سے 43114 روپے رہی جبکہ چاندی کی فی تولہ قیمت760روپے کی سطح پر مستحکم ریکارڈ کی گئی۔جبکہ پاکستانی روپے کے مقابلے میں امریکی ڈالر سمیت سعودی ریال اور اماراتی درہم کی قدروں میں استحکام رہا

جبکہ یورو اور برطانوی پائونڈکی قدروں میں مندی ریکارڈ کی گئی۔ ہفتہ کو امریکی ڈالر، سعودی ریال اور اماراتی درہم اپنی گذشتہ کاروباری روز کی قدروں پر برقرار رہے جبکہ یورو اور برطانوی پائونڈ کی قدروں میں بالترتیب 31 پیسے اور 9 پیسے کی کمی رونماء ہوئی۔نیشنل بینک آف پاکستان سے جاری کردہ اعداد و شمار کے مطابق امریکی ڈالر اپنی گذشتہ کاروباری روز کی قیمت فروخت 105.65 روپے اور قیمت خرید 103.14 روپے پر برقرار رہا۔ اسی طرح خلیجی ممالک کی اہم کرنسی سعودی ریال بھی قیمت فروخت 28.03 روپے اور قیمت خرید 26.37 روپے جبکہ اماراتی درہم قیمت فروخت 28.76 روپے اور قیمت خرید 26.37 روپے پر بند ہوئی۔ مزیدبرآں یورپین ممالک کی اہم کرنسی یورو کی قیمت فروخت 112.92 روپے سے کم ہو کر 112.61 روپے اور قیمت خرید 110.25 روپے سے کم ہو کر 109.95 روپے رہ گئی جبکہ برطانوی پائونڈ قیمت فروخت 132.22 روپے سے کم ہو کر 132.13 روپے اور قیمت خرید 129.08 روپے سے کم ہو کر 129 روپے رہی۔

موضوعات:سونے قیمت