اسلام آباد(آئی این پی )پاکستان پیپلز پارٹی کے رہنما سعید غنی نے کہا ہے کہ اسٹیٹ بینک کی رپورٹ نے پی ٹی آئی کو بے نقاب کر دیا ہے۔ جیسے جیسے وقت گزر رہا ہے جعلی خان کی مزید جعل سازیاں بے نقاب ہو رہی ہیں۔ اسٹیٹ بینک کی رپورٹ پر ردعمل کا اظہار کرتے ہوئے سعید غنی نے کہا کہ 18اکاؤنٹس کی مکمل تحقیقات ہونی چاہئیں کہ ان اکاؤنٹس میں کتنے پیسے آئے ، کہا ں سے آئے اور کہاں خرچ ہوئے اس طرح یہ یقین

مزید مضبوط ہو رہا ہے کہ عمران خان نے شوکت خانم کے چندے پر بھی بہت بڑا ڈاکہ ڈالا ہے۔ انہوں نے کہا کہ بیرون ملک علیمہ خان کی جائیداد چندے میں خردبرد کا راز فاش کر رہی ہے۔ سعید غنی نے کہا کہ اب تو بہت ضروری ہوگیا ہے کہ علیمہ خان کے خلاف جے آئی ٹی تشکیل دی جائے اور ان سے منی ٹریل پوچھا جائے۔ سعید غنی نے کہا کہ دوسروں پر چور چور کی تہمت لگانے والا خود بہت بڑے ڈاکو کے روپ میں پکڑا گیا ہے۔