دبئی(این این آئی)دبئی کی تمام پروازوں میں پیجرز اور واکی ٹاکیز پر پابندی عائد کر دی گئی۔غیرملکی خبررساں ادار ے نے بتایاکہ ٹریول ایڈوائزری کے مطابق دبئی پولیس کو مسافروں کے پیجرز اور واکی ٹاکیز ضبط کرنے کا حکم دے دیا گیا۔اماراتی ایئر لائنز نے ایران، لبنان، عراق اور اردن کے لیے پروازیں منسوخ کر دیں۔

اس حوالے سے اماراتی ایئر لائنز کا کہنا تھا کہ اردن کے لیے 6 اکتوبر کے بعد پروازیں شروع ہو سکتی ہیں جبکہ ایران اور عراق کے لیے 7 اکتوبر تک پروازیں بند ہوں گی۔اماراتی ایئر لائنز کا کہنا تھا کہ لبنان کے لیے پروازیں 15 اکتوبر تک منسوخ کی گئی ہیں۔واضح رہے کہ گزشتہ ماہ لبنان میں حزب اللہ کے ارکان کے زیرِ استعمال متعدد پیجرز میں دھماکے ہوئے تھے۔

اس حوالے سے لبنانی وزیر صحت فراس الابیض نے کہا تھا کہ دو روز میں مواصلاتی آلات میں دھماکوں سے 37 افراد جاں بحق ہوئے۔عرب میڈیا کے مطابق بیروت میں پریس کانفرنس سے خطاب کرتے ہوئے لبنانی وزیر صحت کا کہنا تھا کہ مواصلاتی آلات کے دھماکوں میں 3 ہزار 539 افراد زخمی ہوئے۔