برلن(این این آئی)جرمنی کے اسٹار فٹبالر میسوت اوزل نے بھارت میں مسلمانوں کے ساتھ انسانی حقوق کی سنگین خلاف ورزیوں پر مودی حکومت پر کڑی تنقید کی ہے ۔غیرملکی میڈیا کے مطابق جرمن فٹبالر نے سماجی رابطے کی سائٹ ٹوئٹر پر اپنے پیغام میں لکھا کہ لیلۃ القدر جیسی مقدس رات کے دوران انڈیا میں اپنے مسلمان بھائیوں اور بہنوں کی سلامتی کیلئے دعاگو ہوں، دنیا کی سب سے بڑی نام نہاد جمہوریت میں انسانی حقوق کے ساتھ کیا ہورہا ہے‘؟۔اس سے قبل بھی جرمن فٹبالر نے رمضان المبارک کے بابرکت مہینے میں عالمی امن کے حوالے سے ٹویٹ کیا تھا، اوزل کا کہنا تھا کہ آئیے نہ صرف یوکرین بلکہ فلسطین، شام، یمن، عراق اور دنیا کے دیگر تمام مقامات جہاں لوگ جنگ کا شکار ہیں انکے لیے دعا کرتے ہیں۔واضح رہے کہ جرمن فٹبالر دنیا بھر میں ظلم و ستم کا شکار مسلمانوں کیلئے اپنی سرگرمی اور وکالت کیلئے مشہور ہے اور مسلمانوں کے خلاف ہونے والے غیر انسانی سلوک پر اپنی آواز بلند کرتے رہتے ہیں۔