اسلام آباد(این این آئی)سیٹلائیٹ ٹاؤن لیڈیز پارک سے گرفتار خود کش حملہ آور خاتون ماہل بلوچ کے شوہر بیباگار بلوچ کا تعلق بھی بی ایل ایف کے عسکری ونگ سے نکلا،خاتون کے سسر ماسٹر محمد حسین کا تعلق بی این ایم کی مرکزی کمیٹی سے ہے۔نجی ٹی وی کے مطابق بیبا گاربلوچ اور اس کا بھائی بی ایل ایف کمانڈرز کے قریب ترین ساتھیوں میں شامل ہیں،

ان کمانڈرز میں واحد بخش قمبر، بی ایل ایف کا بانی ڈاکٹر اللہ نذر اور دلیپ شکاری شامل ہیں۔یاد رہے کہ 2016 میں بیباگار اور اس کا بھای نوکب آپس میں پیسے اور ہتھیاروں کے تنازعے پر لڑای کے نتیجے میں مارے گے تھے، ماہل کی بہن کی شادی بھی ڈاکٹر اللہ نذر کے بھتیجے یوسف سے ہوی جو بلوچ حقوق کی تنظیم کا چیئرمین ہے۔سوشل میڈیا پر خودکش حملہ آور خاتون ماہل کو مسنگ پرسن بنانے کا پروپیگینڈہ بھی بے نقاب ہو چکا، ٹوئٹر پر بی ایل ایف کی دا بلوچستان پوسٹ کے ہینڈل سے شائع تصویر اور جھوٹا بیانیہ صرف مکروہ چہرے کو چھپانے کی ناکام سازش ثابت ہوئی۔واضح رہے کہ کوئٹہ کے علاقے سیٹلائیٹ ٹاون میں لیڈیز پارک کے قریب سی ٹی ڈی نے ایک خاتون کو گرفتار کرکے اس کے قبضے سے خود کش جیکٹ برآمد کرلی۔ترجمان سی ٹی ڈی کے مطابق جیکٹ میں چار کلو گرام دھماکا خیز مواد موجود تھا، ملزمہ کے خلاف مقدمہ درج کرلیا گیا۔سی ٹی ڈی ترجمان کے مطابق خاتون دہشت گرد ماہل کا ہدف اہم تنصیبات اور سیکیورٹی فورسز تھیں۔ترجمان کے مطابق مبینہ خودکش حملہ آور خاتون کا تعلق دہشت گرد تنظیم سے بتایا جارہا ہے، مبینہ خودکش بمبار سے نیٹ ورک کے دیگر افراد کی گرفتاری کیلئے تفتیش جاری ہے۔ترجمان سی ٹی ڈی کے مطابق سوشل میڈیا پر دہشت گرد تنظیم کی جانب سے خودکش حملہ آور خاتون کو مسنگ پرسن بنانے کا پروپیگنڈا کیا جارہا تھا جو کہ بے نقاب ہوگیا ہے۔