اسلام آباد(این این آئی)وزیراعظم آفس نے کہاہے کہ آذربائیجان سے اگلے ماہ سے رعایتی ایل این جی کار گو پاکستان آنا شروع ہوجائیں گے، کابینہ نے آذربائیجان سے ایل این جی پاکستان لانے کی منظوری دے دی ہے۔ وزیراعظم آفس کے اعلامیے میں کہا گیاکہ وزیراعظم شہباز شریف نے آذربائیجان کے صدر الہام علیوف کو باکو میں ملاقات میں آگاہ کیا،

وزیراعظم شہباز شریف گزشتہ 6ماہ سے اس ڈیل پر کام کررہے تھے۔اعلامیے میں کہا گیاکہ آذربائیجان کی قومی ایل این جی کمپنی ہر ماہ رعایتی قیمت پر ایک ایل این جی کارگو پاکستان بھجوائے گی،دونوں ممالک نے توانائی، زراعت، ٹرانسپورٹ، دفاع، سرمایہ کاری و تجارت اور دیگر شعبوں میں باہمی تعاون کو وسعت دینے پر اتفاق کیا ہے،آذربائیجان پاکستان کی توانائی کی ضروریات پوری کرنے میں تعاون کرے گا۔

ملاقات میں اتفاق کیا گیاکہ آذربائجان پاکستان کی تیل و گیس کے شعبے میں مدد کرے گا،پی ایس او، آذربائیجان کی کمپنی سوکار پاکستان کی توانائی ضروریات پورا کرنے میں کردار ادا کرے گی،آذربائیجان کی آذرایئرلائن اسلام آباد اور کراچی کیلئے دو پروازیں چلائے گی،شمسی توانائی کے شعبے میں آذربائیجان پاکستان میں سرمایہ کاری کریگا،دفاع کے شعبے میں تعاون کو بڑھانے پر بھی دونوں ممالک کی قیادت میں اتفاق کیا گیا۔آذربائیجان کے صدر الہام علیوف نے کہاکہ آذربائیجان پہلے ہی پاکستان سے درآمدی چاول پر امپورٹ ڈیوٹی سے استثنیٰ دے چکا ہے۔

موضوعات:ایل این جی