کراچی (این این آئی) پیپلزپارٹی کے شریک چیئرمین آصف علی زرداری اور فریال تالپور کی گرفتاری اور وزیراعلیٰ سندھ سید مراد علی شاہ کی گرفتاری کے پیش نظر سندھ اسمبلی میں پیپلزپارٹی کے فارورڈ بلاک کے قیام کے لیے کوششیں تیز کردی گئی ہیں۔ نصف درجن ارکان سندھ اسمبلی کے فارورڈ بلاک بنانے کے لیے متحرک ہونے کی خبروں کے بعد پارٹی قیادت نے ان ارکان کے خلاف سخت کارروائی کا عندیہ دیا ہے جبکہ سندھ کابینہ میں بھی آئندہ چند روز میں تبدیلیوں کا امکان ہے۔

انتہائی باخبر ذرائع کے مطابق پاکستان پیپلزپارٹی میں فارورڈ بلاک کے قیام کے لیے سات سے آٹھ ارکان متحرک ہوگئے ہیں،یہ ارکان پیپلزپارٹی کے بعض رہنماؤں کے ذریعہ دیگر ارکان سندھ اسمبلی کے ساتھ بھی رابطے کررہے تھے۔پیپلزپارٹی کے ان ارکان کے مختلف سیاسی جماعتوں کے رہنماؤں کے ساتھ بھی رابطے تھے۔ذرائع کا کہنا ہے کہ پیپلزپارٹی کے بعض ارکان سندھ اسمبلی نے فارورڈ بلاک کی خبریں اپنی پارٹی قیادت کودیں تھیں،جس کے بعد پیپلزپارٹی کی اعلی قیادت نے گروپ بندی کے منصوبے پر کام کرنیوالے رہنماوں کوتنبیہ کی کہ اگر انہوں نے پارٹی میں گروپ بندی کی کوشش کی تو ان کے خلاف سخت ایکشن لیا جائے گا۔ذرائع کے مطابق آئندہ چند روز میں گروپ بندی میں ملوث پیپلزپارٹی ایسے رہنماؤں کے خلاف کارروائی کا امکان ہے جبکہ سندھ کابینہ میں بھی ردوبدل کیا جاسکتا ہے۔سندھ کابینہ کے بعض وزراء کے محکمے تبدیل اور کچھ سے واپس لے لیے جائیں گے۔ادھر بدلتی ہوئی سیاسی صورت حال کے پیش نظر پیپلزپارٹی کے مرکزی رہنماؤں اور ارکان قومی اسمبلی کے رابطوں میں بھی تیزی آگئی ہے۔پیپلزپارٹی کے رہنماؤں اور ارکان قومی اسمبلی منگل کو سندھ اسمبلی پہنچنے جہاں انہوں نے فریال تالپور سے ملاقات کی ہے۔ذرائع کا کہنا ہے کہ سینئر صوبائی وزیر ناصر حسین شاہ کے استعفیٰ کے بعد پیپلزپارٹی کے حلقوں میں شدید بے چینی پائی جاتی ہے اور

وہ یہ بات تسلیم کرنے کو تیار نہیں ہیں کہ ناصر حسین شاہ نے محض گھوٹکی کے ضمنی انتخاب کی وجہ سے وزارت سے استعفیٰ دیا ہے۔یہاں یہ امر قابل ذکر ہے کہ وزیراعلیٰ سندھ سید مرا د علی شاہ کی ممکنہ گرفتاری کی صورت میں سید ناصر حسین شاہ کا نام سندھ کے آئندہ وزیراعلیٰ کے طور پر بھی لیا جارہا تھا تاہم ان کے اچانک استعفیٰ نے پیپلزپارٹی کے رہنماؤں کو حیران کردیا ہے۔ذرائع کے مطابق سندھ کی سیاست میں آئندہ چند روز انتہائی اہمیت کے حامل ہیں۔اس دوران انتہائی اہم تبدیلیاں رونما ہوسکتی ہیں۔