راولپنڈی(آن لائن)ایل این جی ٹرمینل کیس میں احتساب عدالت نے سابق وزیراعظم شاہد خاقان عباسی کا مزید چودہ روزہ جسمانی ریمانڈ منظورکرلیا ہے۔تفصیلات کے مطابق ایل این جی ٹرمینل ریفرنس میں گرفتار مسلم لیگ (ن) کے رہنما اورسابق وزیر اعظم شاہد خاقان عباسی کو جسمانی ریمانڈ مکمل ہونے پرنیب ٹیم نے احتساب عدالت کے ڈیوٹی جج شارخ ارجمند کے سامنے پیش کیا۔نیب پراسیکیوٹر کی جانب سے تفتیش کے لئے مزید جسمانی ریمانڈ کی استدعا کی گئی،ڈیوٹی جج کے استفسار پر نیب کے وکیل نے بتایا کہ شاہد خاقان عباسی کے جسمانی ریمانڈ کو چوالیس روزمکمل ہوگئے ہیں۔اس موقع پر سابق وزیراعظم نے

ایک بار پھر جسمانی ریمانڈ کی مخالفت سے انکار کرتے کہا کہ میں تو پہلے ہی عدالت سے کہہ چکا ہوں کہ نوے روز کا ریمانڈ دے دیں،میں نے کوئی جرم ہی نہیں کیا، ان کو ریمانڈ لینے دیں۔بعد ازاں عدالت نے شاہد خاقان عباسی کو مزید چودہ روز کے جسمانی ریمانڈ پر نیب کی تحویل میں دے دیا۔عدالت میں پیشی کے موقع پر ملاقات کی اجازت ملنے پرلیگی رہنماؤں خواجہ آصف ، خرم دستگیر، احسن اقبال ،ملک ابرار ، انجم عقیل اور سردار مہتاب نے شاہد خاقان عباسی سے ملاقات کی۔واضح رہے کہ سابق وزیراعظم شاہد خاقان عباسی پر الزام ہے کہ انہوں نے ایل این جی ٹرمینل کے ٹھیکے میں اختیارات کا غلط استعمال کیا ۔

موضوعات:شاہد خاقان عباسی