کراچی(این این آئی)پاکستانی کرکٹ ٹیم کے سابق کپتان شاہد آفریدی نے پاکستان تحریکِ انصاف کے چئیرمین اور سابق وزیرِ اعظم عمران خان کا نام لیے بغیر انہیں تنقید کا نشانہ بنا ڈالا۔شاہد آفریدی نے گزشتہ دنوں یومِ تکریمِ شہدا کی تقریب میں شرکا سے خطاب کیا اور ملک کے لیے فوج کی قربانیوں کو سراہا۔ شاہد آفریدی نے اپنے اس خطاب میں کسی کا نام لیے بغیر ایسا پیغام دیا جو عمران خان کی جانب ہی اشارہ معلوم ہوتا ہے۔

سابق کپتان نے کہا کہ اس ملک کے لیے میرے بڑوں نے، آپ سب کے بڑوں نے کئی قربانیاں دی ہیں اور میرا یہ ماننا ہے کہ قربانیاں دینے کا بھی ایک خاص وقت ہوتا ہے اور ابھی ملک کی کامیابی اور ترقی کے حوالے سے کام کرنے کا وقت ہے۔انہوں نے کہا کہ اگر کوئی یہ سمجھتا ہے کہ وہ اکیلے ہی اس ملک کو لے کر چل لے گا تو یہ اسکی بہت بڑی بھول ہے،اس ملک کو ہم سب نے مل کر بنایا ہے اور اس کو ہم سب مل کر ہی لے کر چل سکتے ہیں، اس کے علاوہ اسکا کوئی دوسرا علاج نہیں ہے۔

انہوں نے کہاکہ میں یہ حلفیہ کہتا ہوں کہ اس ملک کے لیے جتنی قربانیاں فوج نے دی ہیں کسی نے نہیں دیں، آزادی کیا ہوتی ہے کشمیری عوام سے پوچھیں۔شاہد آفریدی کے اس بیان کے وائرل ہوتے ہی سوشل میڈیا صارفین نے اسے عمران خان پر تنقید قرار دیا، جہاں کسی نے اس بیان کے حق میں بات کی تو کچھ صارفین نے شاہد آفریدی پر ہی تنقید کردی۔

موضوعات:شاہد آفریدی