اسلام آباد(مانیٹرنگ ڈیسک ، این این آئی )پی ٹی آئی رہنما فیصل واوڈا نے دعویٰ کیا ہے کہ ہمارے اسٹیبلشمنٹ کیساتھ تیزی سے رابطے بحال ہو رہے ہیں،ان سے بات چیت چل رہی ہے اور میں بھی اس کا حصہ ہوں۔ہم نیوز کے پروگرام بریکنگ پوائنٹ ودھ مالک میں گفتگو کرتے ہوئے

انہوں نے کہا کہ اسٹیبلشمنٹ کسی اور ملک کی تو نہیں ہے، اگر کچھ لوگوں نے غلط فہمی پیدا کی ہے تو اسے حل اور کلیئر بھی کرسکتا ہے۔شہباز گل سے متعلق سوال پر ان کا کہنا تھا کہ میں ان کے بیان کی مذمت کرچکا ہوں، کسی پر تنقید ضرور ہوسکتی ہے لیکن تذلیل نہیں ہونی چاہئے۔انہوں نے کہا کہ عدالت فیصلہ دے چکی ہے تو اب کوئی کچھ نہیں کر سکتا،ن لیگ کی طرح غنڈہ گردی کی سیاست پر ہم یقین نہیں رکھتے،شہدا کیخلاف جس نے بھی بات کی ہے وہ غلط ہے۔ان کا کہنا تھا کہ شہدا کیخلاف جس نے بات کی ہے اس کی زبان کھینچ لینی چاہئے۔دوسری جانب چیئرمین تحریک انصاف عمران خان کے بعد پی ٹی آئی سندھ کے صدر علی زیدی نے بھی شہباز گل کے بیان کو غلط قرار دیدیا۔پاکستان تحریک انصاف کے رہنما علی زیدی نے کہا کہ شہباز گل نے غلط بات کی تاہم آصف زرداری اور نواز شریف نے بھی بیانات دیے، ان کو کیوں جیلوں میں نہیں ڈالا جا رہا؟ قانون سب کے لیے برابر ہونا چاہیے۔یاد رہے کہ گزشتہ روز عمران خان نے اعتراف کرتے ہوئے کہا تھا کہ شہباز گل کے بیان سے فوج کو اکسانے کا ایسا تاثر گیا، شہباز گل نے فوج سے متعلق غلط لائن بولی، ایسا نہیں کہنا چاہیے تھا۔

موضوعات:فیصل واوڈا