گلگت ،پشاور، سکھر (این این آئی)گلگت بلتستان اور خیبر پختونخوا کے بالائی پہاڑی علاقوں پر برف باری ہوئی ہے۔اطلاعات کے مطابق بابوسرٹاپ اور گیٹی داس میں ایک فٹ سے زائد برف پڑچکی ہے جس کے باعث بابوسر ناران نیشنل ہائی وے بند کردیا گیا ہے۔

رپورٹس کے مطابق ہیوی مشینری کے ذریعے برف ہٹانے کا کام جاری رہا۔بابوسر ٹاپ پر درجہ حرارت منفی 4 سینٹی گریڈ ریکارڈ کیا گیا جبکہ سوات کے پہاڑوں پر بھی برف باری کے بعد جون میں سردی کا احساس ہونے لگا ہے۔دوسری جانب ملک کے بالائی علاقوں میں پری مون سون کی بارشوں کے بعد سندھ کے بیراجوں میں پانی کی سطح میں اضافہ ہو نے لگا ہے، بیراجوں میں سطح آب بڑھنے سے کینالز میں پانی مرحلہ وار بڑھایا جانے لگا،کراچی کو پانی فراہم کرنیوالی کینجھر جھیل میں بھی پانی کی سطح بڑھ کر 47 اعشاریہ40 فٹ تک پہنچ گئی ہے۔انچارج کنٹرول روم سکھر بیراج عبدالعزیز سومرو کے مطابق 24 گھنٹوں میں گڈو بیراج پر 1 ہزار اور سکھر بیراج پر 2 ہزار کیوسک پانی میں اضافہ ہوا ہے۔کیر تھر کینال میں 44 سو سے بڑھا کر 4 ہزار 850 ، رائس کینال میں 34 سو سے 4 ہزار 15 اور دادو کینال میں 28 سو بڑھا کر 3 ہزار 20 کیوسک پانی فراہم کیا جارہا ہے۔نارا کینال میں 10 ہزار 600 اور روہڑی کینال میں 10 ہزار 600 کیوسک پانی کی فراہمی جاری ہے۔کینجھر جھیل میں پانی کی سطح میں اضافے کے بعد جھیل کی سطح 47 اعشاریہ40 فٹ پر پہنچ گئی ہے جبکہ یکم جون کو پانی کی سطح 46 اعشاریہ 90 فٹ تھی۔آبپائشی ذرائع کے مطابق بالائی اور کوہستانی علاقوں میں بارشوں سے جھیل کی سطح میں مزید اضافہ متوقع ہے۔

موضوعات:برفباری