اسلام آباد(مانیٹرنگ ڈیسک، این این آئی )لیجنڈری اداکار یوسف خان المعروف دلیپ کمار کو سرکاری اعزاز کے ساتھ سپردِ خاک کردیا گیا۔ بھارتی میڈیا کے مطابق دلیپ کمار کو مکمل سرکاری اعزاز کے ساتھ سپردِ خاک کیا گیا جس کی ویڈیو ان کے ترجمان فیصل فاروقی نے مائیکرو بلاگنگ ویب سائٹ ٹوئٹر پر شیئر کی۔ اس ویڈیو میں دیکھا جاسکتا ہے کہ

فورسز اہلکار انھیں خراجِ تحسین پیش کرتے ہوئے بھارتی پرچم میں لپیٹ رہے ہیں۔ دوسری جانب پاکستان کی شوبز شخصیات نے لیجنڈ اداکار دلیپ کمار کے انتقال پر گہرے رنج و غم کا اظہار کرتے ہوئے کہا ہے کہ ان کے انتقال سے لازوال فن کا ایک عہد ہمیشہ کے لئے ختم ہو گیا ، دلیپ کمار کے انتقال سے پیدا ہوانے والا خلاء کبھی پر نہیں ہو سکے گا ،وہ محبت اور امن کے بھی بہت بڑے داعی تھی جسے کبھی فراموش نہیں کیا جا سکتا۔ سینئر اداکارقوی خان ،عثمان پیرزادہ ،ندیم بیگ، شاہد ،مصطفی قریشی، جاوید شیخ، بابرہ شریف، شا ن ،سنگیتا،دیبا ، نشو ، الطاف حسین ، سید نور ، حسن عسکری، جرار رضوی ، احسن خان ، ہمایوں سعید سمیت دیگر نے ان کے انتقال پر گہرے رنج و غم کا اظہار کرتے ہوئے کہا کہ دلیپ کمار کی صرف پاکستان اور بھارت ہی نہیں بلکہ دنیا میں پرستاروں کی تعداد کروڑوں میں ہے ، انہوں نے اپنے لازوال اداکاری سے فن کی بے پناہ خدمت اور جب بھی فلم انڈسٹری کی تاریخ لکھی جائے گی ان کا نام ہمیشہ سنہرے حر وف میں لکھا جائے گا ۔ انہوں نے کہا کہ دلیپ کمار کے انتقال سے فن کی دنیا میں سوگ کی فضاء ہے اور ہر کوئی دلیپ کمار سے جڑی یادوں کو تازہ اور ان کی لازوال اداکاری کا ذکر رہا ہے ۔ دعا ہے کہ اللہ عالیٰ انہیں جوار رحمت میں جگہ دے اور ان کے لواحقین او رپرستاروں کو صبر جمیل دے۔

موضوعات:دلیپ کمار