اسلام آباد (مانیٹرنگ ڈیسک) وزیراعلیٰ پنجاب عثمان بزدار  نے چینی کی سبسڈی دینے میں جلدی کی، انہیں چینی کی برآمد پر سبسڈی دینے کی اتنی جلدی تھی کہ انہوں نے کابینہ سے منظوری بعد میں لی سبسڈی پہلے دے دی، معروف صحافی انصار عباسی نے اپنی رپورٹ میں لکھا کہ وزراء کو تجویز بھی پڑھنے نہیں دی گئی اور بعد میں براہِ راست پرانی تاریخوں میں قانونی ضابطوں کی منظوری دے دی گئی۔

انہوں نے کہا کہ چینی کی برآمد پر 3 ارب روپے کی سبسڈی دینے میں جلد بازی کی گئی۔ کابینہ کی جانب سے سبسڈی کی منظوری دیے جانے کے تین دن بعد وزیراعلیٰ پنجاب عثمان بزدارنے یکم جنوری 2019ء کو پرانی تاریخوں میں کابینہ کے جائزے کیلئے ایک کیس کی منظوری دی۔ معروف صحافی نے سرکاری دستاویزات کی روشنی میں انکشاف کیا کہ سبسڈی کی منظوری دینے کا معاملہ وزیراعلیٰ پنجاب کیلئے اتنا جلد بازی کا تھا کہ اقتصادی رابطہ کمیٹی اجلاس کے اہم نکات موصول ہونے کا انتظار کیے بغیر وزیراعلیٰ عثمان بزدار نے اسلام آباد سے ملنے والی زبانی معلومات کے بعد اجلاس طلب کیا اور بعد میں صوبائی محکموں کے درمیان مشاورتی عمل کا انتظار کیے بغیر اور اہم ترین فنانس ڈیپارٹمنٹ کی رائے کو نظرانداز کرتے ہوئے انہوں نے  ایجنڈا سے ہٹ کر سبسڈی کا معاملہ 20 دسمبر 2018ء کو کابینہ میں پیش کرکے سب کو حیران کر دیا۔ طے شدہ طریقے کی بربادی کے معاملے کو درست کرنے کے لئے عثمان بزدار کو اپنے اقدامات کی پرانی تاریخوں میں منظوری دینا پڑی۔ معروف صحافی نے کہاکہ پنجاب کے محکمہ خزانہ نے ای سی سی کے فیصلے پر تحفظات کا اظہار کیا تھا۔

موضوعات:عثمان بزدار