اسلام آباد (این این آئی)زیر خارجہ شاہ محمود قریشی نے وا ضح کیا ہے کہ بھارت اگر سمجھتا ہے کہ آئینی ترامیم سے مسئلہ کشمیر حل ہو جائے گا تو اس کی یہ خام خیالی ہے،بھارت کی جانب سے آرٹیکل 370 ختم کرنے پر وزیر خارجہ شاہ محمود قریشی نے میڈیا سے گفتگو میں کہا کہ

بھارت نے اقوام متحدہ میں جو وعدہ کیا تھا اس کی خلاف ورزی کی۔انہوں نے کہاکہ بھارت نے جو آئینی ترامیم کی ان کا کوئی قانونی اور اخلاقی جواز نہیں۔شاہ محمود قریشی نے کہا کہ کشمیر کے عوام نے آرٹیکل ختم کرنے کی کھل کر مخالفت کی ہے،آئینی ترامیم سے بھارت عوامی رائے عامہ کو تبدیل نہیں کر سکتا۔انہوں نے کہاکہ پاکستان مسئلے کو ہر امن طور پر حل کرنے کے خواہشمند ہیں،پاکستان کی خواہش تھی کہ معاملے کو مل بیٹھ کر حل کریں تاہم بھارت نے کشمیر کے معاملے کو مزید الجھا دیا ہے۔انہوں نے کہاکہ بھارت سمجھتا ہے ترامیم سے مسئلہ حل ہو جائے گا تو یہ خام خیالی ہے کیونکہ کشمیریوں کے حق خود ارایت کو کوئی ترمیم بدل نہیں سکتی۔شاہ محمود قریشی نے مزید کہا کہ آج بھارت نے مسئلہ کشمیر کو عالمی حیثیت دلا دی۔دنیا کے سامنے بھارت کے مقاصد بے نقاب ہو گئے ہیں۔مسلم امہ کو بھارت کے اقدامات کا نوٹس لینا چاہئیے۔شاہ محمود قریشی نے کہا کہ امریکی صدر سے رجوع کرنے پر بھی مشاورت کر رہے ہیں جب کہ اقوام متحدہ میں تعینات پاکستان کی مستقل مندوب ملیحہ لودھی کو نیویارک پہنچ کر رابطے کرنے کی ہدایات کر دی ہیں۔وہ نیو یارک پہنچ کر عالمی برادری کو مقبوضہ کشمیر کی صورتحال سے آگاہ کریں گے۔

موضوعات:شاہ محمود قریشی