واشنگٹن(این این آئی)امریکی صدر ڈونلڈ ٹرمپ نے ایران پر ایک طویل عرصے سے یورینیم کو خفیہ طور پر افزودہ کرنے کا الزام عاید کیا ہے اور خبردار کیا ہے کہ ایران کے خلاف امریکا کی نمایاں پابندیوں میں جلد اضافہ کردیا جائے گا۔غیرملکی خبررساں ادارے کے مطابق ایک بیان میں امریکی صدر ٹرمپ نے کہاکہ ایران 150 ارب ڈالر کی ڈیل کی خوف ناک طریقے سے مکمل خلاف ورزی

کرتے ہوئے یورینیم کو افزدوہ کررہا ہے۔اس سے یہ ڈیل جان کیری اور اوباما انتظامیہ نے کی تھی۔یادرہے کہ اس ڈیل کی مدت چند ایک برسوں میں ختم ہونے والی تھی۔ایران پر بہت جلد پابندیوں میں نمایاں انداز میں اضافہ کردیا جائے گا۔واضح رہے کہ امریکی صدر ڈونلڈ ٹرمپ نے مئی 2018ء میں ایران سے طے شدہ جوہری سمجھوتے سے یک طرفہ طور پر دستبردار ہونے کا ا علان کردیا تھا اور اسی سال نومبر میں ایران کے خلاف سخت اقتصادی پابندیاں عاید کردی تھیں جن میں اس کی تیل کی برآمدات اور بنک کاری کے نظام کو ہدف بنایا گیا ہے۔ان تعزیری اقدامات کے بعد سے امریکا کی ایران کے ساتھ کشیدگی میں اضافہ ہو اہے اور گذشتہ ماہ خلیج میں امریکا کا ایک ڈرون مار گرائے جانے کے بعد تو ایک طرح سے خطے میں جنگ کا ساماحول پیدا ہو گیا تھا مگر پھر صدر ٹرمپ نے مفاہمانہ بیانات جاری کرنا شروع کردیے اور انھوں نے کہا کہ وہ ایرانی نظام کے ساتھ کسی پیشگی شرائط کے بغیر مذاکرا ت کے لیے تیار ہیں مگر ایران نے ان کی اس پیش کش کو ٹھکرا دیا اور کہا کہ وہ پہلے جوہری سمجھوتے میں واپس آئیں اور پھر مذاکرات کی بات کریں۔

موضوعات:ایران،پابندیاں،اضافہ،ڈونلڈ ٹرمپ