اسلام آباد(مانیٹرنگ ڈیسک) وزیر اعظم کے مشیر برائے خارجہ امور سرتاج عزیز نے امت مسلمہ پر زور دیتے ہوئے کہا ہے کہ عالم اسلام کو مشکل کی اس گھڑی میں روہنگیا مسلمانوں کی مدد کرنی چاہئے۔ملائیشیا کے شہر کولاللمپور میں اسلامی تعاون تنظیم (او آئی سی) کے اجلاس سے خطاب کرتے ہوئےمشیر خارجہ سرتاج عزیز کا کہناتھا کہ پاکستان نے ہمیشہ مظلوم مسلم آبادی کی مدد کی ہےاورکشمیر،

فلسطین سمیت دیگر خطوں میں انسانی حقوق کی خلاف ورزیوں پر مسلسل آواز بلند کی ہےریڈیو پاکستان کی رپورٹ کے مطابق سرتاج عزیز نے اپنے خطاب میں کہا کہ وزیر اعظم نواز شریف کی جانب سے روہنگیامسلمانوں کو ضروری حقوق اور ریلیف فراہم کرنے کے لیے میانمار حکومت پر سیاسی وسفارتی دباؤ بڑھانے کے لیے اقوام متحدہ کے جنرل سیکریٹری کو خط لکھا گیا ہےجس میں انتباہ کیا گیا ہے کہ مسلمانوں پر ظلم بند کروایا جائے۔مشیر خارجہ کا کہنا تھا کہ روہنگیا مسلمانوں کی حالت زار عالمی برادری کے ضمیر کے لیے چیلنج بنتی جا رہی ہے۔اپنے خطاب میں سرتاج عزیز نے میانمار حکومت کی جانب سے کوفی عنان فاؤنڈیشن کے ساتھ مل کر راکھائن ریاست کی عوام کی فلاح کے لیے بنائی گئی کمیٹی کی بھی تعریف کی۔واضح رہے کہ کوفی عنان کی سربراہی میں ایک ایڈوائزی کمیشن راکھائین ریاست میں فرقہ وارانہ کشیدگی کی تحقیقات بھی کرے گا جس کی وجہ سے وہاں مقیم لاکھوں روہنگیا مسلمان بے گھر ہوچکے ہیں۔

موضوعات:برما روہنگیا